Gap shundaki, “Andijon” professional futbol klubi qoshida bo'lgan Bo'ston dahasidagi “Viloyat bolalar va o'smirlar futbol maktabi”ning yosh futbolchilari yaqinda Toshkent viloyatining Bekobod shahrida va Andijon viloyatining Shahrixon tumanida o'tkazilgan turnirda sovrindorlar qatoridan o'rin egalladi. Shu bois ushbu musobaqalarda 2-3-o'rinlarni egallagan yosh futbolchilarni bugun ota-onalari va murabbiylari ishtirokida taqdirlab, kichik medallar va bir qator sovg'alar ulashildi.
Ushbu tadbir Bo'ston dahasidagi futbol maktab binosida o'tkazildi. Marosimda “Andijon” FK ijrochi direktori Sanjarbek Yakubbekov ham ishtirok etdi va so'z navbati birinchi u kishiga berildi. – Assalomu alaykum xurmatli ota-onalar, murabbiylar va bolajonlar. Jamoamiz qoshidagi futbol maktab tarbiyalanuvchilari o'zlari ishtirok etgan musobaqalarda sovrinli o'rinlarni qo'lga kiritib qaytgani, bizni juda-juda quvontirdi. Ertangi kunimiz bo'lmish ushbu bolalardan umidimiz nihoyatda katta. Muxtaram yurtboshimiz tomonidan millionlar o'yiniga keng tarzda e'tibor qaratilayotganini a'lohida ta'kidlab o'tishni istardim. Xususan viloyatimiz rahbari xurmatli Shuhratbek Abdurahmonov ham futbolga katta e'tibor qaratib, uning rivoji yo'lida keng-ko'lamdagi sharoitlarni yaratib bermoqda. “Andijon” futbol klubining falsafasi mahalliy yoshlarni yuzaga chiqarish va mustahkam poydevor qurish. Joriy yildan shu maqsad yo'lida ishga qattiq kirishganmiz. Klubimiz tasarrufida bo'lgan ushbu futbol maktabidan ko'plab taniqli futbolchilar yetishib chiqqani hech kimga sir emas. So'zimga isbot tariqasida ayni damda ushbu maktab direktori sifatida faoliyat yuritayotgan Bekzodbek Karimovni aytish mumkin. Umid qilamizki kelgusida ularning soni ortib boradi. Bu yerda o'z oliy ligada o'ynagan bir nechta yosh murabbiylar faoliyat yuritmoqda. Ular “Andijon” jamoamizga munosib o'yinchilarni tarbiyalab, etkazib beradi degan umiddaman. Barchangizni turnirdagi ajoyib ishtirok uchun tabriklayman – deydi Sanjarbek Sirojiddinbekovich.
Shundan so'ng so'z navbati “Viloyat bolalar va o'smirlar futbol maktabi” direktori Bekzodbek Karimovga berildi. – Avvalambor shu erga kelib tadbirimizda ishtirok etib turganinglar uchun minnatdorchilik bildiraman. Qo'l ostimizdagi yosh futbolchilar yaqinda Bekobod shahri va Shahrixon tumanida o'tkazilgan turnirlarda sovrinli o'rinlar bilan qaytdi. Bolalarimiz asta-sekin o'zlarini ko'rsatib bormoqda. Maqsadimiz nafaqat “Andijon” futbol klubiga balki turli yoshdagi o'smirlar, yoshlar va olimpiya terma jamoalariga munosib futbolchilarni etkazib berishdir. Buning uchun siz ota-onalardan ham iltimos qilardimki, biz bilan birgalikda hamkorlikda bolalaringizni tarbiyasida yordam berishlaring juda muhim. Ularni to'g'ri yo'ldan etaklash bizning burchimizdir. “Andijon” jamoamiz tomonidan maktabimizga bo'layotgan e'tibor yuqori darajada bo'layotganini aytish lozim. Vice-prezident Abdisolomov Marufjon Jamoliddinovich boshchiligidagi “Andijon” futbol klubi xodimlari bilan doimiy a'loqadamiz va hamkorlikda ish olib borilmoqda - deydi Bekzodbek Hamidullaevich.
So'ngra yosh futbolchilarga kumush medallari va bir qator qimmatbaho sovg'alar topshirildi. Ushbu turnirda yosh bolalarga murabbiylik qilgan murabbiylar ham e'tibordan chetda qolmadi va ularga ham sovrinlar topishirilib, munosib ravishda taqdirlandi. Shuningdek futbol maktabi direktori ushbu dargohda faoliyat olib borayotgan murabbiy va shifokorning tug'ilgan kuni munosabati bilan ularni ham sovg'a-salomlar bilan tabrikladi.
Tadbir so'nggida so'z ota-onalarga berildi va ular ham futbol maktabida shug'ullanayotgan farzandlarining musobaqada sovrindor bo'lib qaytganidan mamnun ekanligini yashirib o'tirmadi va farzandlarini ham kelgusida taniqli futbolchilar Lionel Messi, Krishtianu Ronaldu singari etuk futbolchi bo'lib yetishishini chin dildan istashlarini bildirdi.
Shu tariqa taqdirlash marosimiga yakun yasaldi.
Islombek Rustambekov
