Зоир Жўрабоев: "Суперлигада учта гол урганман ва уларнинг барчаси "Бунёдкор" дарвозасидан ўрин олган"

- Бугунги ўйин ҳақида фикрингиз...

- Бугун бизнинг ягона вазифамиз ғалаба қозониш эди, ҳаммаси яхши кетаётганди, 2:0 ҳисобида олдинга чиққандик ва кўплаб голли имкониятлар яратдик. Афсуски, вазиятлардан фойдалана олмадик ва ўйиннинг охирида бир нечта гол ўтказиб юбордик... 

- Бугун таблога ўз номингизни ёздириб қўйдингиз. Суперлигадаги бундан аввалги голингизни ҳам икки йил аввал сафарда "Бунёдкор" дарвозасига урган экансиз. Қизиқ тасодиф.

- Ҳа, мен Суперлигада ҳозиргача учта гол урганман ва уларнинг барчаси "Бунёдкор" дарвозасидан ўрин олган. Билмайман, бу тасодифми ёки бошқа нарса.

- Миш-мишларга қараганда, иккинчи даврада "Нефтчи"га қайтишингиз мумкин экан. Бу қанчалик ҳақиқатга яқин?

- Бу ҳақда ҳозир гапиришга эрта, ҳеч нарса дея олмайман. Турли хил гаплар тарқаляпти, лекин ҳозирча ҳеч нарса аниқ эмас.