Воҳид Холбоев: "Дуранг учун ўйнагандик"

- Ўйин тўғрисида нима дейман? Қўл остимдаги футболчиларнинг аксари ёш бўлгани туфайли учрашув аввалида бироз ҳаяжонланишди. Сабаби, рақиб таркибида тажрибали ўйинчилар бор. Агар кеча тўғри ўйнамаганимизда ютқазиб қўйган бўлардик. Бизнинг таркибимизда ҳам бир нечта тажрибали ўйинчилар бор. Улар қолган ёшларни тўғри йўлга йўналтира олишини натижасида ғалаба қозондик.

Учрашувдан аввал "Оқ-тепа" биринчи лигадаги энг кучли жамоа эканлигини билардик. Буни футболчиларга ҳам айтиб ўтгандик. Рости, бугун қарши ҳужум тактикасидан фойдаландик. Футболда рақибга қараб тактика танлаш бор. Биз шундай йўл тутдик. Акс ҳолда "Оқ-тепа"нинг тажрибали футболчилари бизни истаган вақтда жазолаб қўйишлари мумкин эди. Чунки футболда ақлли футбол муҳим роль ўйнайди.

Учрашувда кичик ҳисоб бўлишини тахмин қилгандим ва шундай ҳам бўлди. Тўп назорати асосан меҳмонларда бўлди, аммо биз тартибли ҳимоя ва иштиёқ эвазига ғалаба қозондик. Очиғи, майдонга дуранг учун чиққандик. Лекин юзага келган имкониятдан фойдаланиб, гол урдик ва ғалаба қозондик, - дейди Холбоев.