"Шўртан": Клубнинг таклифлари Эдгар Гесснинг қўйган “катта” талабларига тўғри келмади

Бугунги кундаги ахборот алмашинуви, воқеалар ривожи, янгиликлар ёки хабарларнинг тарқалиши шу қадар товуш тезлигида юз беряптики, биттасини ўқиб, таҳлил ва мулоҳаза  қилиб улгурмасингдан кейингиси навбатда турибди.

Яқиндагина сайтимизда жамоамизга янги бош мураббий тайинлаш масаласи кун тартибида турганлиги ва бу борада муайян ишлар олиб борилаётганлиги хусусида ёзган эдик. Ниҳоят “Шўртан” жамоаси бош мураббийлиги ўрнига бир нечта таниқли ва тажрибали номзодлар орасидан Эдгар Гесс танланганлиги ҳақида хабар бердик. “Оқ бўрилар” жамоаси ва унинг мухлислари учун бегона бўлмаган ушбу мутахассис билан дастлабки ва айтиш керакки, оғзаки келишувга эришилгандек бўлинди, ҳам. Эдгар Яковлевич жамоанинг бир нечта машғулотларини ўтказди. Унинг бошқарувида футболчиларимиз “Сўғдиёна” ва “Обод” жамоасига қарши синов-назорат учрашувларида майдонга ҳам тушишди. Ташқаридан қараганда, гуёки ҳамма иш ўз жойида кетаётгандек ва ҳамма “Шўртан” ҳамда Эдгар Гесс ўртасида битим тузилади деб кутиб турган бир паллада режа амалга ошмади. Клубимиз раҳбарияти яхши ниятлар билан ишга таклиф қилинган мутахассис билан олиб борилган музокараларни сўнгги паллада тўхтатишга мажбур бўлди. Сабаби “Шўртан” ПФКнинг таклифлари Э.Гесснинг қўйган “катта” талабларига тўғри келмади. Бу эса табиийки, жамоамиз томонидан битимни амалга ошмаслигига олиб келди.

Ҳаёт давом этади. Ўзининг ривожланиш йўналиши, юксак мақсад ва вазифаларига эга бўлган “Шўртан” жамоаси биргина мутахассис хизматларига қараб ҳам, боғланиб ҳам қолмаган. Муносиб номзодларни топиш ҳамда улар билан музокаралар олиб бориш, жамоанинг эса миллий чемпионатимиз учрашувларида яхши иштирок этиб, мухлисларга чиройли ва мазмунли ўйинлар тақдим қилиш ишлари давом этади.

Янгиликларни сайтимиз орқали кузатиб боринг.