Шомуродов "Машъал" академиясига қандай келиб қолганини биласизми?

Россиялик журналистлар ҳам Шомуродов тинмай мақташяпти. Бу бежизга эмас. Бунинг замирида Элдорнинг катта меҳнати ётибди. Биласиз, руслар ҳар кимни ҳам мақтайвермайди. Шомуродов Россияга боргач сабр қилди ва "Ростов" асосий таркибига кириш учун бор кучи билан ишлади.

"Машъал" академиясидан чиққан йигитчанинг бир кун келиб Россия чемпионатида тўп тепишини ким ҳам ўйлабди дейсиз. Албатта, ўша йиллари клубга раҳбарлик қилган Баҳром Давлатов академияга жуда катта эътибор бериб, барибир шу маскандан чиқадиган ёшлар кучлироқ клубда тўп тепишини тасаввур қилган.

Мана энди бугунги кунда "Машъал" тарбияланувчиларидан икки нафари Элдор Шомуродов "Ростов"да, Отабек Шукуров эса "Шаржа"да тўп тепяпти. Бунда шу футболчиларни тарбиялаб вояга етказган мураббий Дилшод Андаевнинг ҳиссаси катта. Дилшод Андаев 1995-96 йилда туғилган футболчилардан бир нечта яхши ўйинчиларни тарбиялаб берди. Муборакда истиқомат қилаётган мураббий билан телефон орқали боғланганимизда, у киши Элдор Шомуродов "Машъал" академиясига қандай келиб қолганини айтиб берди:

- "2008 йил тайёрлов гуруҳлари мусобақасида қатнашиш учун Сурхондарё вилоятининг Жарқўрғон туманига боргандик. Ўшанда "Машъал"да селекционер-мураббий бўлиб ишлаган Виктор Георгевич Алешников иккита ёш бола бор, шуларни бир синаб кўрмайсанми деганди. Мен олиб келинг, синаб кўрамиз дедим. Кейин билсам, у киши айтган икки футболчи Элдор Шомуродов билан Сардор Абдураимов экан. Ўшанда Элдор энди 13 ёшга тўлганди".

- "Элдор "Машъал"га келганидан сўнг уч йилни қўл остимда академияда ўтказди. Қашқадарё болалар чемпионати ва иккинчи лигада ўйнаб юрди. Кейин биринчи лигадаги фарм-клубимизга ўтди ва биринчи лигада ҳам ўзини кўрсата бошлади. Яхши ўйнаб кетганидан "Машъал"нинг асосий таркибига жалб қилинди".

- "Ёрқин ўйини сабаб "Бунёдкор" эътиборини тортди ва тошкентликлар сафига кўчиб ўтди. Ҳозир эса "Ростов"да фаолият олиб боряпти. Элдор болалигидан меҳнаткаш эди, қолаверса унда туғма иқтидор ҳам юқори бўлган. Шундай футболчи билан ўз вақтида бирга ишлаганимдан фахрланаман. Ўйлайманки, жаҳон чемпионати саралаш ўйинларида Элдор Шомуродовнинг терма жамоамизга кўп фойдаси тегади".

Х.Холиқов суҳбатлашди.