Қирғизистон президенти терма жамоа бош мураббийи Крестининга қўнғироқ қилди (матбуот анжумани) ФОТО

Матбуот анжуманининг иккинчи қисмида Қирғизистон бош мураббийи Александр Крестинин қатнашди ва ўйинолди фикрлари билан ўртоқлашди.

"Мусобақанинг учинчи учрашувида кўп нарса ҳал бўлади. Муҳим паллага яқинлашдик. Эртанги муҳим беллашув олдидан оптимистик руҳда ва ўзимизга бўлган ишонч билан тайёргарлик кўряпмиз. Ғалабага эришиш учун қўлимиздан келган барча имкониятни ишга соламиз.  Бизни осон баҳс кутаётгани йўқ. Филиппин яхши шаклланган жамоа", - дея ўз фикрларини билдирди Александр Крестинин.

- Қирғизистонга эртага нафақат ғалаба, балки имкон қадар йирикроқ ҳисобдаги ютуқ керак. Филиппин эса ҳимояга алоҳида эътибор қаратадиган жамоалар сирасига киради. Улар ўтган икки беллашувни 5 ҳимоячи билан ўтказишди. Рақибнинг услуби ва имкон қадар йирикроқ ғалаба кераклигинини инобатга олган ҳолда эртанги баҳс олдидан тактик ўзгаришларга қўл урасизми? (Шаҳбоз Беғамов, "championat.asia")

-  Филиппин билан бўладиган учрашув қиймати ва аҳамият нечоғлик эканлигини тушуниб турибмиз. Барча деталларни эътиборга оламиз. Биз бу ўйинга руҳан ва тактик тарафлама ҳам алоҳида тайёргарлик кўрдик. Ўйлашимча, жамоамиз бунга тайёр. Албатта, рақибдан келиб чиққан ҳолда тактик ўзгаришларга ҳам қўл урамиз. Қайд этганингиздек, учрашувга тайёргарлик кўриш жараёнида рақибнинг услубини ҳам инобатга оламиз. 

- Гуруҳдаги иккита рақиб билан ўйнадингиз. Филиппин ҳам улар билан ўйнаб бўлди. Учрашувдан олдин мазкур баҳсларни таҳлил қилдингизми ва жамоаларни ўзаро таққослай оласизми? (хорижлик журналист)

- Ҳозир ўйин бўйича ким кучлироқ, ким яхшироқ эканлигини солиштирмаган бўлардим. Бу нотўғри. Тўғри, иккинчи турдан кейин икки жамоада ҳам 0 очко. Лекин бу Филиппинни кучсиз жамоа эканлигини англатувчи жиҳат деб ҳисобламайман. Биз барчамиз футбол билан шуғулланамиз. Эртага эса терма жамоа тарихида янги саҳифа очиш имкониятига эга эканлигимизни тушуниб турибмиз. Исталган футболчи ёки мураббий бу каби ҳолатга кўпроқ тушишни истайди.

- Тахминан саноқли соатлар олдин Қирғизистон матбуотида мамлакат президенти сизга қўнғироқ қилгани ҳақида ёзилди. Агарда сир бўлмаса, суҳбат давомида президент нималарни гапирди ва сиз қандай жавоб бердингиз? Бу жуда муҳим ва қизиқ... (Қирғизистонлик журналист)

- Ҳақиқатдан ҳам 1,5 соат аввал Қирғизистон президенти Сооронбай Жээнбеков Шарипович телефон орқали қўнғироқ қилди. Биз ўзаро суҳбатлашдик. Суҳбат чоғидаги мамлакат раҳбарининг гапларини йигитларга етказдим. Биласизми, мамлакат раҳбарининг қўллаб-қувватлови ниҳоятда муҳим ва қувонарли ҳолат. Бу нафақат футболчилар учун, балки барча учун муҳим. Бу нимадан далолат беради? Биринчи навбатда биз бир мақсад йўлида бирлашганимизни англатади. Қирғизистонда барча терма жамоа учун жон куйдирмоқда, қайғурмоқда. Футбол барчани бирлаштираётгани қувонарли ҳолат.

- Ўтган иккита баҳсда Қирғизистон оғир вазндаги жамоалар фонида ёмон кўринмади. Жамоа муносиб ўйнаганини барча қайд этди. Табиийки Хитой ва Жанубий Кореядан фарқли ўлароқ Филиппин бошқа даражадаги жамоа. Жамоангиз эса ўтган иккита ўйинда кўрсатган потенциални эртанги баҳсда яна бир бор кўрсатиб, буни натижа орқали исботлаши керак бўлади. Ўтган турларда жамоа катта куч йўқотди. Шу нуқтаи назардан олиб қаралса, Қирғизистон эртанги беллашувга жисмоний жиҳатдан тайёрми? (Шаҳбоз Беғамов, "championat.asia")

- Биз жисмоний жиҳатни ҳам эътиборга олган ҳолда мусобақага маълум режа асосида яхши тайёргарлик кўрдик. Ўтган иккита баҳсда бўлгани каби бу ўйинга ҳам жамоани жисмоний тарафлама ҳам тайёр деб айта оламан. Бу тарафлама муаммо йўқ. Мусобақа тақвимини алоҳида инобатга олган ҳолда маълум режимда тайёргарлик босқичини олиб боряпмиз. Бизга қўшимча куч бераётган яна бир жиҳат шуки, эртага терма жамоамиз ўз тарихида янги саҳифа очиш имкониятига эга. Мусобақа олдидан режалаштирган мақсадимиз сари дастлабки қадамни қўйишга яқинмиз.

Фарҳод Мусабеков: - "Бизни жуда қийин баҳс кутмоқда. Биз истаётган кейинги босқич ҳаёли ва мақсади рақибимиз бўлмиш Филиппинда ҳам борлигини унутмаган ҳолда учрашувга жиддий ёндошамиз. Менимча, жамоамиз эртанги курашга тайёр. Терма жамоамиз муҳити анча кўтаринки кайфият орқали жуда яхши ҳолатда".

Шаҳбоз Беғамов

Дубай, "Рашид" стадиони.