ПФЛ нега фақат Бақоевни жаримага тортди. Бошқаларга мумкинми?

Ушбу хабарда "Суперлиганинг 1-тури доирасидаги “Машъал” - “Сўғдиёна” футбол клублари ўртасидаги бўлиб ўтган учрашувдан сўнг “Сўғдиёна” футбол клуби бош мураббийи Улуғбек Бақоев матбуот анжуманида иштирок этмагани, бу билан у Профессионал футбол клублари учун 2020 йилги мусобақалар регламентининг 9.17-бандини бузгани учун Интизом кодексининг 5.34-бандларига асосан унга нисбатан огоҳлантириш ҳамда моддий жарима интизом чораси қўлланилди", - деб ёзилган.

Қизиғи айнан ўша ўйиндан кейин "Машъал" бош мураббийи Зоир Тўрақулов ҳам матбуот анжуманида иштирок этмаганди. Биринчи турда ҳам иккинчи турда ҳам "Машъал" катта мураббийи Дилявер Ваниев матбуот анжуманида қатнашди.

2-турда "Қизилқум" - "Сурхон" учрашувидан кейин мезбонлар бош мураббийи Ҳамиджон Актамов ҳам матбуот анжуманига кирмади. Унинг ўрнига Обид Худоёров келди.

Бироқ ПФЛ ҳозиргача фақат Улуғбек Бақоевга нисбатан жарима қўллади? Ушбу хабардан сўнг "Машъал" ёки "Қизилқум" клуби вакиллари биздан норози бўлишлари мумкин. Аммо эртага шу ҳолатнинг акси бўлса биз "Машъал" ёки "Қизилқум"ни ёнини олишга тайёр.

Шунчаки ПФЛ барча клубларга бирдек муносабатда бўлишини истаймиз холос.


Нарзулла Сайдуллаев