"Пахтакор"нинг янги бош мураббийи ким бўлади? (Сўровнома якунлари)

Бу мавсум ҳам Ўзбекистон чемпионати ва Кубогини қўлга киритган грузиялик мураббий "Пахтакор" билан хайрлашишга қарор қилди. Эндиликда бўшаб қолган ўринни ким олади, шу кунларда кўпчиликни бу савол қизиқтираётгани бор гап. 

Телеграм каналимизга "Пахтакор"нинг янги бош мураббийи ким бўлади?" мазмунида сўров қўйгандик ва вариантлар сифатида беш нафар мураббийни келтирганмиз. Қуйида сўровнома натижаларига тўхталиб ўтамиз.

12 мингдан зиёд ўқувчи қатнашган сўровда Питер Хюистра вариати энг кўп 38 фоиз овоз тўплади. Нидерландиялик мураббий балки шу пайтгача панада қолиб келгандир, бироқ Осиё чемпионлар лигасида Арвеладзеда коронавирус билан боғлиқ муаммолар пайдо бўлганида бу мураббий жамоани бошқариб, ўзидан илиқ таассурот қолдирди. Кўриниб турибдики, Хюистра "Пахтакор"ни бошқара олиш салоҳиятига эга ва катта эҳтимол шу мутахассис расман тайинланса керак. 

Кейинги ўринни 18 % овоз билан Жасур Абдураимов эгаллади. Абдураимов янги мураббийлар штаби келгунига қадар жамоани бошқариб келаётганди. Клубда анча йиллардан бери фаолият юритиб келаётганини инобатга олсак, жамоанинг ютуқ ва камчиликларини жуда яхши билади, барча футболчиларни танийди ва балки у ҳам бош мураббий бўлиб қолиши мумкин. 

"Насаф" бош мураббийи Рўзиқул Бердиев "Пахтакор"ни бошқарадими? Ким билсин. Бердиев варианти 17 фоиз овоз билан учинчи бўлди ва мураббий Қаршидан Тошкентга кўчиб келиши ҳам мумкин. Лекин масаланинг яна бир томони, "Насаф" ҳам келаси йил халқаро майдонларда ўйнайди. Шунда Бердиев "Пахтакор"га келадиган бўлса, "Насаф"ни ким бошқаради деган савол туғилади. Шу боис Рўзи аканинг Қаршидан келиши жуда қийин масала бўлса керак. 

Вариантлар орасида тахмин қилинган Миржалол Қосимов 14 % овоз тўплади. АГМК бош мураббийи бир пайтлари ўзи тўп тепган "Пахтакор"да ишлаши мумкинми? Агар шундай бўлса, бу ҳақиқий "бомба" бўлади. Европада кўп бор кўрамиз, мураббий ўзи футбол ўйнаган жамоада ишлашини. Мана масалан Рональд Куман ҳозирда "Барселона"ни бошқаряпти. Лекин бу ерда ҳам кичик муаммо бор. Гап шундаки, келаси йил АГМК ҳам халқаро майдонда ўйнайди. 

Сўровномадаги энг охирги номзод Самвел Бабаян варианти 13 фоиз овоз йиғди. Бабаян Хитойдаги фаолиятини тугатиб юртимизга қайтганидан хабарингиз бор. Унинг яқинда "Навбаҳор"ни қабул қилиб олиши кутилганди, бироқ нимадир бўлиб бу иш амалга ошмади. Бизнингча, Самвел Бабаяннинг "Пахтакор" бош мураббийи бўлиш эҳтимоли ниҳоятда кам бўлса керак.