Олий лига-2013. Ислом Тўхтахўжаев кетма-кет иккита ўйинда дублга эришган ягона ҳимоячи

Бу ўйинда мезбонлар ҳимоячиси Ислом Тўхтахўжаев дублга эришди. Эътиборлиси мураббийлар қарорига кўра ярим ҳимояда ўйнаётган Тўхтахўжаев учта ўйиндан буён гол урмоқда. 23-турда "Нефтчи"га қарши ўйинда ҳимоячи мавсумдаги дастлабки (!) голини урди. Кейинги турда Ғузорда "Шўртан"га қарши кечган баҳсда бир йўла иккита гол уришга эришди. Юқорида ёзилганидек "Навбаҳор" дарвозасига ҳам иккита тўп киритилди. 

2013 йилги мавсумда кетма-кет иккита ўйинда дублга эришиш холати икки бор қайд этилганди. 

"Локомотив" ҳужумчиси Фарҳод Тожиев дастлабки учта турда иккитадан гол урганди. "Бунёдкор" тўпурари Олександр Пишур эса 6 ва 7-турларда дублга эришганди. Агар "темирйўлчилар" ҳимоячиси сўнгги турда ҳам дублга эришса Фарҳод Тожиевнинг мавсум рекордини такрорлайди. 

Ушбу мавсумда Ислом Тўхтахўжаев кетма-кет иккита ўйинда дублга эришган ягона ҳимоячи бўлиб тарихда қолади. Сабаби 25-турда бошқа ҳеч қайси ҳимоячи иккита гол урмаган. Мавсум тугашига эса битта тур қолди холос.