Квесиешвилининг автодубли ёхуд грузиялик футболчидан 2та ўйинда 4та гол

Юртимиздаги фаолиятини 2012 йилда бошлаган гурзиялик ҳимоячини ишқибозларимиз “Бухоро” ва “Олмалиқ”даги фаолияти орқали яхши билишади.  Марказий ҳимоячи жорий мавсумдан “Қизилқум” шарафини ҳимоя қилиб келмоқда. “Кончилар” сафида ҳам етакчиликни ўз қўлига олган футболчи, асосий таркибнинг муҳим бир аъзоси бўла олди. Квесиешвили олий лиганинг сўнгги икки турида жами 4та гол киритди. Эътиборлиси у ҳар бир ўйинда иккитадан гол уриб келмоқда.

Хусусан 19-турда “Олмалиқ”қа кечган баҳсда Георгий ҳимоячига бўлишига қарамай собиқ жамоаси дарвозасини икки бор аниқ нишонга ола билди. Учрашувнинг сўнгги дақиқалари ўтиб бораётганида, аниқроғи, 88 ва 90+1-дақиқаларда футболчи олмалиқликлар дарвозаси томон аниқ зарба йўллаб, “Қизилқум”га муҳим ғалаба келтирганди. Эътиборлиси, навоийликлар бунгача 1:2 ҳисобида мағлуб бўлаётганди.

Шунингдек Георгий куни-кеча бўлиб ўтган 20-тур ўйинида ҳам иккита гол киритишга эришди. Бу сафар ҳар икки гол ҳам ўз дарвозасига. Аслида навоийликлар шу куни “Динамо” майдонидан камида дуранг билан қайтишга жуда яқин турганди. 5-дақиқада Квесиешвили ўз дарвозасига тўсатдан тўп киритиб юборганидан сўнг, “Қизилқум” аъзоси Алишер Азизов мувозанатни тиклашга эришганди. Бироқ 85-дақиқа ўтиб бораётганида гурзиялик футболчи яна жамоасини қийин ахволга солиб қўйди ва “кончилар”  шу тариқа аламли мағлубиятга учради. Албатта бу ҳар қандай футболчи учун ёқимсиз холатдир. Жорий мавсум ҳисобидан антидубль қайд этган футболчи ҳозирча биргина Георгий бўлиб турибди. Кўрамиз буни қолган турларда кимдир такрорлармикин. Ишонамизки, Квесиешвили энди кейинги турларда жамоаси учун фойда келтирадиган голлар уради.