“Бу оптимал таркиб эмас. Ҳакам қарорлари тўғри эди, мағлубиятни тан ола билиш ҳам керак" — Санъат Шихов Эрон билан ўйин ҳақида

Унинг фикрича, мазкур ўйин нафақат натижа, балки таркиб ва янги футболчилар имкониятларини баҳолаш нуқтайи назаридан катта аҳамиятга эга бўлди.

— Бу мусобақа биз учун номзод футболчиларни кўриб олиш учун жуда яхши имконият бўлди. Бундай ўйинлар янги футболчиларни босим остида қандай ўйин кўрсатишини кўрсатиб беради — деди Шихов.

У Темур Кападзенинг ҳужумкор тактикасига тўхталиб ўтди:

— Тимур Кападзе футболчиларимизнинг имкониятларини яхши билади, тактикаси ҳужумкор. Албатта, Эрон 115 дақиқа давомида бир киши кам ўйнади. Лекин шунга қарамасдан, футболчиларимиз рақибни ҳимояга бутунлай ўтириб қолишига мажбур қила олишди. 

Шихов таркиб ва ҳимоядаги ҳаракатларни ҳам юқори баҳолади:

— Ҳали бу таркибни оптимал деб бўлмайди. Жаҳон чемпионатига қадар энг кучли таркиб аниқ бўлади. Асосий ҳимоячимиз Абдуқодир йўқлигига қарамасдан, ҳимоячиларнинг ишончли ўйнагани мени хурсанд қилди.

Собиқ футболчи ҳакамлар фаолияти ҳақида ҳам фикр билдирди:

— Ўйинда ВАР тизими ишлади ва ҳакамлар ҳар бир вазиятни кўриб чиқиб қарор қабул қилишди. Менимча, уларнинг қарорлари тўғри бўлди. Бу эса терма жамоамизнинг ғалабаси ҳаққоний эмаслигини билдирмайди. Футболда шундай ҳолатлар бўлади. Рақиб қоидаларни ҳурмат қилиши шарт. Профессионал спортчилар мағлубиятни тан олишни билиши керак, ҳакам ёки бошқаларни айблаш тўғри эмас.

Шиховнинг сўзларига кўра, Ўзбекистон ҳужумчиларининг салоҳияти Осиё миқёсида юқори баҳоланади:

— Ҳужумчиларимиз Осиёда энг кучлилардан. Канотлардаги вингерларимиз ҳам тезкор. Шуни ҳисобга олиб, имкониятларимизни юқори баҳолайман, — дея хулоса қилди у.