ЖЧ саралашидаги рақиб - Хитой терма жамоаси халқаро турнирда иштирок этади

2017 йилнинг 10–15 январь кунлари Ўзбекистон миллий терма жамоасининг ЖЧ–2018 турниридаги рақиби – Хитой термаси халқаро футбол турнирида иштирок этади. Мазкур турнирга айнан Хитой мезбонлик қилади. Хитой термасидан ташқари мусобақада Исландия, Чили ва Хорватия терма жамоалари қатнашади.

Турнир регламентига кўра, Хитой терма жамоаси Марчелло Липпи қўли остидаги илк ўйинини 10 январь куни Исландияга қарши ўтказади. Мазкур беллашув ғолиби 15 январь куни Хорватия – Чили жуфтлиги ғолиби билан бош соврин учун курашади. Юқоридаги ўйинларда мағлуб бўлган жамоалар 14 январь куни учинчи ўрин учун баҳс олиб боради.

Маълумот учун, ЖЧ–2018 турнирига учинчи саралаш босқичи “А” гуруҳи 5-туридан кейин Хитой терма жамоаси 2 очко билан сўнгги – 6-ўринни эгаллаб турибди. Ўзбекистон терма жамоаси 9 очко билан 3-поғонада бормоқда. Ҳисобида 11 очко бўлган Эрон гуруҳда пешқадамлик қилаётган бўлса, Жанубий Корея 10 очко билан 2-ўриндан жой олган.