Истеъдодни йўқ қилишнинг 13 усули... (Ёш футболчилар ўқимасин!)
04 aug 2016 17:28
News
![](https://championat.asia/upload/storage/217480_original.jpg)
![](/upload/storage/217480_220.jpg)
Истеъдодни йўқ қилишнинг 13 усули... (Ёш футболчилар ўқимасин!)
Бу борада 13 хил мисолни эътиборингизга тақдим этамиз. Демак бошладик!
Психоделик мусиқага қизиқиш
Швециялик Мартин Бенгтссон Стокгольмдан 200 км узоқликдаги Эребру шаҳарчасида туғилган. Отаси - рассом ва қўшиқчи, доимий сафарларда юрадиган одам. Онаси эса рақс тўгараги раҳбари. "Аякс" академияси ҳақидаги фильмни томоша қилган Мартин кунига 5 маҳал кўчада югуриб, машғулотлар ўтказишни бошлайди. 16 ёшидаёқ Швеция олий лигасидаги "Эребру" жамоаси асосий таркибида майдонга тушишни бошлайди. Бироқ, жамоа ветеранларининг ҳазил ва камситишларидан безиган футболчи миллионлар ўйинидан безиб кетади ва панк-мусиқага қизиқиб қолади.
Шу билан бирга ўша вақтда Швеция ўсмирлар терма жамоаси сардори ҳисобланган ёш футболчини "Аякс", "Челси" ва "Интер" каби жамоалар кўрикка таклиф қилгандилар. Миландаги илк машғулотдаёқ Марко Матераццини алдаб ўтишга муваффақ бўлган футболчи "Интер" мураббийи Заккеронининг мақтовига сазовор бўлади. "Интер"даги маошига у янги машина сотиб олади, гарчи ҳайдовчилик гувоҳномаси бўлмасада...
2004 йили Швециядаги мусиқа фестивалида Жим Морисси билан танишиб қолади. Мартин "Интер" ҳақида ҳеч қандай тасаввурга эга бўлмаган қизалоққа шу қадар боғланиб қоладики, кейинчалик у интервьюларидан бирида қуйидаги сўзларни айтган: "Мен гоҳида Роберто Баджо, гоҳида эса Курт Кобейн бўлишни истаб қолардим".
"Интер" академиясининг баъзи футболчилари Марихуана чекканликлари учун жазоланишди: "Бизни эркинликдан маҳрум қилишди, дўконга чиқишни таъқиқлашди ва ҳаттоки кечқурун устимиздан эшикни қулфлаб қўйишди. Ўзимни ҳудди қамоқдагидек ҳис қила бошладим. Ана ўша вақт қўлга гитара олиб мусиқа чалиш ва шеърлар ёзишни бошлаб юбордим. Швеция терма жамоасининг машғулотларидан қайтганимда эса фаррош кундалигим, шеърларим ва суратларимни ташлаб юборганини билдим". "Бу ер жуда бетартиб. Футболчининг хонаси бундай бўлмаслиги лозим", - деганди фаррош ўшанда.
Кейинги куни тонгда Бангтссон мусиқа плейерларини ёқади ва ваннага кириб, томирларини кесиб ташлайди...
Мартин бугунги кунда Берлинда яшайди ва Waldemar психоделик гуруҳининг қўшиқчиси сифатида фаолият олиб боради. Унинг автобиографияси асосида Швецияда телефильм суратга олинган.
(*Психоделик мусиқа - турли гиёҳванд ва алкогол моддалар таъсирида қўшиқ куйлаш)
Ичкилик
2005 йили бразилиялик чап қанот ҳимоячиси Сисиньо "Сан-Паулу" билан Либертадорес Кубоги ғолибига айланади, клублар ўртасидаги ЖЧда чемпион бўлади. Терма жамоа билан Конфедерациялар кубогида ғолиб чиқади. Кейинчалик "Реал", ундан сўнг "Рома"га ўтади.
"Мен кунига бир ёки икки стакан билан чеклана олмайман. Одамлар менга агар шу темпда алкогол ичишни давом эттирсам ўлишим мумкинлигини айтишган.
"Рома"нинг машғулотидан сўнг эртанги куни ўйин йўқлигини биламан. Шу сабаб, уйга қайтганимдан сўнг ичардим, чакардим. Менга клубга бориш ёқарди. Ичкиликдан ўзимни тўхтата олмасдим. Ҳеч қачон гиёхванд моддалар истеъмол қилмаганман. Чунки, допинг-тестлар ҳақида билардим. Бўлмасам, буни ҳам синаб кўрган бўлардим", - дейди у.
Сисиньо шу йил баҳорда "Сивасспор" билан биргаликда Туркия қуйи дивизионига тушиб кетди.
Эринчоқлик, дангасалик
19 ёшида 28 миллион евро эвазига "Рома"га кўчиб ўтган Антонио Кассано 21 ёшида Италия терма жамоасида дебют қилади ва ўша ўйинидаёқ гол киритади. Икки йилдан сўнг эса "Реал" билан шартнома имзолайди.
"Сўнгги 10 йил ичида одамлар барчасига ўзим айбдор эканлигимни айтишди. Муаммо шундаки, ҳақиқатдан ҳам бунга ўзим айбдорман. Машғулотларда бор кучим билан ишламасдим. Фақатгина сўнгги йилларда мен муаммо мураббийда эмас, ўзимда эканлигини тушуниб етдим. Агар бизга қаттиққўл мураббий келса, доим норозилик билдирардим. Мен ўз потенциалимдан фойдалана олмадим. Лекин, буни жуда кеч тушундим", - деганди у ўз интервьюларидан бирида.
Кассано ўтган мавсумда А Серияда "Сампдория" сафида иккита гол кирита олди.
Жамоа танлай билмаслик...
2003 йили Аргентиналик ҳужумчи Роберто Нанни мамлакат чемпионатида "Велес Сарсфилд" сафида 18 та ўйинда 15 та гол киритиб, чемпионат тўпурарларидан бири бўлади ва 5 миллион доллар эвазига "Динамо Киев" сафига бориб қўшилади.
Киевликлар футболчини чемпионат учун рўйхатдан ўтказишга улгурмайдилар. Шу сабабли, у дастлабки ярим йил давомида ўринбосарлар сафида ўйнаган. У ўшанда 18 та ўйинда 17 маротаба рақиблар дарвозасини ишғол қилишга муваффақ бўлганди. Трансфердан бир йил вақт ўтибгина, у Украина чемпионатида захирадан майдонга тушади ва 8 дақиқадан сўнг жамоасининг ғалаба тўпини киритади. Бироқ, шундан сўнг ҳам у "Динамо" асосий таркибида бошқа майдонга тушмади. Орадан бир неча ҳафта ўтиб, Нанни Испаниянинг "Альмерия" жамоасига ижарага берилади. "Афсуски, аргентиналик ҳужумчи жамоамизга мослашиб кета олмади", - дейилганди ўшанда "Динамо" расмий сайтида.
Бу йил Нанни Колумбия иккинчи дивизионида 5 та ўйинда 1 та гол кирита олди.
Руҳий тушкунликка тушиб қолиш...
Бразилиялик ҳужумчи - Адриано! 2001 йилги Конфедерациялар кубогининг иккинчи рақамли тўпурари, Америка Кубоги - 2004 нинг энг зўр футболчиси бўлган Адриано 13 миллион евро эвазига "Интер"га ўтган.
"Адрианони доимо назорат қиладиган инсон - отаси бўлган. Лекин, фожеа юз берди: Унга телефонда отаси вафот этганлигини маълум қилишди. У телефон трубкасини қўйиб йиғлади, бақириб йиғлай бошлади...", - деганди Хавьер Занетти ўз интервьюларидан бирида.
Биз президент Моратти билан бирга уни қўллаб-қувватлардик, доимо ёнида бўлишга ҳаракат қилардик. Иван Кордоба билан бирга эса унга Ибрагимович ва Роналдо даражасига яқинлашиб бораётганлигини, агар озгина ҳаракат қилса улардан ҳам ўтиб кетиши мумкинлигини тушунтирардик. Бироқ, Адрианони руҳий тушкунликдан олиб чиқиш бизнинг қўлимиздан келмади" - деганди у.
Футболчининг ўзи эса: "Менда депрессия бўлган. Роберт Энке қилган ишни - ўз жонимга қасд қилиш истаги менда ҳам пайдо бўлган. Деярли барча машғулотларга ичган ҳолда бора бошладим", деб эслаб ўтади.
Бу йил яна футбол қайтган Адриано АҚШ тўртинчи дивизионидаги "Майами" жамоасида ўйнай бошлади.
Қиёматни кутиш
Аргентиналик Карлос Роа Испанияда 1996/97 йилги мавсумнинг энг яхши дарвозабони деб топилган. "Мальорка" билан Кубок эгалари кубоги финалигача етиб борган, терма жамоаси билан ЖЧ чорак финалида иштирок этган. Ҳаттоки, Алекс Фергьюсон уни Петр Шмейхелнинг ўрнига "Манчестер Юнайтед"га таклиф қилмоқчи бўлган...
30 ёшга тўлганидан сўнг оиласини олиб тоғу-тошларга равона бўлган Карлос 2000 йили бўлиши лозим бўлган Апокалипсисга тайёргарлик кўра бошлайди. Бир йилни диний китоблар ўқиш билан ўтказган Роа барчасини тушуниб етади ва "Мальорка"га қайтади. Лекин, унинг ўрнида бошқа дарвозабон пайдо бўлганди. 2004 йилда унга саратон ҳасталиги ташҳиси қўйилган. Ушбу касалликни енгиб ўтишга муваффақ бўлган собиқ посбон айни пайтда Мексиканинг "Гваделахара" жамоасида Матиас Алмейдага дарвозабонлар мураббийи сифатида ёрдам бермоқда.
Аёлларга ўралашиб қолиш
Голландиялик футболчи Энди ван дер Мейде "Аякс" билан ЕЧЛ чорак финалигача чиққан, "Интер" сафида ўйнаган ва "Эвертон" томонидан яхшигина суммага сотиб олинган.
Ливерпулда қилган биринчи иши янги Феррари сотиб олиш бўлди. Бунинг шарафига "Ньюс Бар"га ташриф буюрган футболчи анавиндан озгина ичиб олганидан сўнг, кўнгли аёлларни тусаб қолади. У ерда Лиза билан танишган Энди қизча билан учраша бошлайди. Лизанинг туғилган кунида эса икки бокал пиво ичган футболчи хушидан кетиб қолади. Касалхонада ўзига келган футболчи унга Лизанинг дўстлари пивога гиёхванд моддалар қўшиб беришганини билиб қолади.
30 ёшида футбол билан хайрлашган футболчи айни пайтда кикбоксчи бўлишни истаб қолган.
Керагидан ортиқ "качка"га берилиб кетиш
2002 йилги МДҲ кубоги арафасида "Спартак" Дмитрий Сичёвни 3000 минг доллар эвазига ўз сафига қўшиб олади. Эртасига "Пьюник"ка қарши ўйинда гол киритган футболчи ўша мавсумда Россия чемпионатининг биринчи даврасида 9 та гол киритишга муваффақ бўлади. Бир йил "Марсел"да ўйнаб қайтган футболчи фаолиятини "Локомотив"да давом эттириб, Россия чемпионига айланади ва йилнинг энг яхши футболчиси номини қўлга киритади.
"Сичёвга тиззасидаги жароҳат ҳалал берди. У даволанди ва тош билан ишлашга жуда қизиқиб кетди. Бунинг оқибатида у мушакларини жароҳатлаб олди", - деганди ўша вақтда мураббий Юрий Сьёмин.
Ўтган мавсумни Қозоғистоннинг "Окжетпес" сафсида ўтказиб, 3 та гол киритган футболчи июнь ойида Малайзия иккинчи дивизиони жамоасида кўрикда бўлиб қайтди.
"Ставка"лар қўйишга муккасидан кетиш
2000/01 йилги мавсумда англиялик ҳужумчи Майкл Чопра "Ньюкасл"нинг ёшлар жамоасида 28 та гол киритган, кейинчалик Англия ёшлар терма жамоаси сафида майдонга тушган.
"Ньюкасл"да ўйнашни бошлаганимда 17 ёшда эдим. Ўшандаёқ таваккал қиладиган қимор ўйинларига берилиб кетаётганимни сезгандим. Автобусда жамоадошлар билан биргаликда 30 минг фунтгача баҳс бойлашардик.
Вазият шу даражага етиб бордики, мен кечаси соат 3 да туриб, Жанубий Америкадаги ўйинларга пул тикишга ўрганиб қолгандим. "Ипсвич"да ўйнаган вақтимда булар натижасида 250 минг қарз бўлиб қолдим. Қарзимни узишда менга клуб ёрдамлашди. Кейинчалик эса, ота-онам уйларини сотишларига тўғри келди", - дейди футболчи.
Шу йилнинг март ойида Шотландиянинг "Аллоа Атлетик" клуби 8 та ўйинда 1 та гол киритган Чопра билан шартномани бекор қилди.
Паспортни қалбакилаштириш
2001 йили А Серия кашфиётларидан бири бўлган 22 ёшли Эриберто ёзда "Кьево"дан "Лацио"га ўтиши керак бўлади.
2002 йилнинг ёзида Эриберто ўзининг ҳақиқий исми Лусиано эканлигини, ёши эса 4 ёш кичрайтирилганини тан олади.
Шу тариқа унинг "Лацио"га трансфери амалга ошмайди. Лусиано дисквалификация сабабли ярим йил футбол ўйнай олмайди. 2013 йили Италиянинг тўртинчи дивизионида фаолиятини якунлайди.
Допинг истеъмол қилиш
1996 йилги ёшлар ўртасидаги Европа чемпионати ярим финали олдидан Италия терма жамоаси бош мураббийи Чезаре Мальдини олдида танлов турганди: дарвозага Жанлуижи Буффонни ёки Анжело Паготтони қўйиш... Мальдини Паготтони танлади ва у пенальтилар сериясида иккита зарбани қайтариб Италия билан Европа чемпиони бўлади ва "Милан"га кўчиб ўтади.
1999 йилнинг ноябрида дарвозабоннинг организмидан допинг топилади у 1,5 йилга футболдан четлатилади. Бу орада у "Триестина" сафида ўз омадини синаб кўришга ҳаракат қилади. Орадан 6 йил ўтиб эса у яна допинг можаросига аралашиб қолади ва шу тариқа умрбод футболдан четлатилади.
Келишилган ўйинларда иштирок этиш
Жанубий Кореялик Ли Ген Хван "Сувон Бльвингз" сафида ўйнаган. 2011 йилнинг июлида мамлакат прокуратураси мамлакат футбол лигасида 20 га яқин келишилган ўйинлар бўлиб ўтганини аниқлайди. Август ойида 16 нафар футболчи қамоқ жазосига ҳукм қилинади. Яна 8 нафари - (улар орасида Ли Ген Хван ҳам бор) 7 миллион вон жаримага тортилганлар ва умрбод футболдан четлатилганлар. 300 соатлик тарбиявий ишлардан сўнг 24 ёшли Ли Ген Хван дўстларига Жанубий Корея қуролли кучлари сафига кириш нияти борлигини маълум қилган.
2012 йилнинг апрелида эса у Инчеондаги юқори қаватли бинодан сакраган ва касалхонага етиб бормасдан жони узилган.
Вояга етмаганлар билан муносабатда бўлиш
Англиялик футболчи Адам Жонсонни ярим йил аввал 15 ёшлик мухлиса билан муносабатларда бўлгани маълум бўлди. Март ойида уни 6 йилга озодликдан маҳрум қилишди.
Май ойида махбуслардан бири билан жанжаллашган Адам фаррошликдан сартарошлик лавозимига ўтказилади. Бугунги кунда унинг қамоқхонадаги маоши ҳафтасига 20 фунтни ташкил қилади.
Sports.ru сайтидан Азиз Тўхтамуродов таржимаси
Similar news
![AMP Logo](https://championat.asia/image/logo-amp.png)
Comments