Интервью. Парк Жи Сунг "Осиё жамоалари ва бошқалар ўртасида фарқ ҳалиям катта"

Маълумот учун, Парк Жи Сунг учта жаҳон чемпионатида ўйнаган ва учаласида ҳам гол урган. У МЮ тарихидаги энг яхши легионерлардан бири ҳисобланади.

- Жанубий Корея учун ЖЧ-2018да гуруҳдан чиқиш асосий вазифами?
- Менимча, шундай. Бир нарсани унутманг, Осиё жамоалари ва бошқалар ўртасидаги фарқ ҳалиям катта. Шу боис биз ҳозирча ярим финалга чиқишни мақсад қила олмаймиз. Аммо гуруҳдан чиқиш учун курашса бўлади. Қуръа ташлаш маросимида аксар Осиё жамоалари 4-саватчадан жой олишди ва бу ҳам даражамизни кўрсатиб турибди. Осиё жамоалари учун навбатдаги жаҳон чемпионатида гуруҳдан чиқишнинг ўзиёқ катта натижа ҳисобланади.

- Ки Сунг Ёнг ва Сон Хён Мин ҳақида гапириб берсангиз. Улар - Кореянинг асосий ўйинчиларими?
- Бу саволга осонлик билан ҳа дея оламан. Иккала футболчи ҳам жамоамиз учун ўта муҳим. Уларда тажриба катта ва жаҳон чемпионати нималигини билишади. Уларнинг ўйини бошқаларга ҳам таъсир кўрсатади.

- Мамлакатдан четда ўйнаш Жанубий Корея терма жамоасини кучайтирадими?
- Четда кучли клубларда тўп тепиш кучли футболчиларга қарши майдонга тушиш деганидир. Бу албатта фойда беради. ЖЧ-2002 пайтида кўп футболчиларимиз ички чемпионатда ўйнарди ва терма жамоани йиғиш қийин бўлмасди. Энди бўлса вазият ўзгарди: бизда легионерлар бор ва терма жамоа фақат ФИФА кунларидагина йиғила олади.

- Сизнингча, бу йилги мундиалда фаворит ким?
- Доимгидек Бразилия. Кейин Германия ҳам анча кучли. Лекин бу иккита жамоа орасида яққол фаворитни айта олмайман. Менимча, жаҳон чемпионатини кузатиб бориш ниҳоятда мароқли бўлади.

- Мезбон жамоа Россиядан нима кутяпсиз?
- Бундай турнирларда мезбондан ҳамма вақт ижобий натижа кутса бўлади. Бир эслаб кўринг-а, 2002 йил биз мезбон сифатида ярим финалгача боргандик. Мен Россияда бўлганман, улар футболга жуда қизиқади ва тайёргарликни ҳам юқори даражада олиб боришмоқда.

- Футболда технология қўлланишига қандай муносабат билдирасиз?
- Бутун дунё ва бошқа спорт турлари технологиядан иборат бўлиб қолди. Табиийки футбол ҳам бундан мустасно эмас. Футболга технология керак, лекин ҳамма гап уни қандай қўллашда.

- Сиз ҳозир ФИФА афсоналари дастури бўйича иш олиб боряпсиз. Бу сизга нима беради?
- ФИФАнинг лойиҳаларида иштирок этиш қизиқарли. Негаки машҳур ўйинчиларни ҳамма вақт мухлислар катта қизиқиш билан кузатиб боришади ва сен ўз ишинг билан уларга таъсир ўтказа оласан. Футбол фақат футболчилар учун эмас, балки дунёдаги ҳамма учун. Эндиликда собиқ футболчи сифатида одамларга қувонч улашаётган эканман, бундан жудаям хурсадман.

Х.Холиқов тайёрлади.