Инжиқтабиат Кейруш ёхуд Осиё футболидаги «Моуриньо»

Кейрушдан энг кўп «ширин сўз» эшитганлар қаторига Ж.Корея ва Қатар футбол жамоатчилигини киритиш мумкин бемалол. Унинг Ўзбекистон футболига қаратилган инжиқликлари ҳам бор, албатта. Қуйида португалиялик мутахассиснинг шундай инжиқликларига эътибор тортамиз.

1-рақамли инжиқлик. Бен Уильямс нега ўйинни рад этмади?

2016 йил сентябрь. ЖЧ-2018 саралаши учинчи раунди 3-туридан ўрин олган Ўзбекистон - Эрон ўйинига австралиялик Бенжамин Уильямс бошчилигидаги ҳакамлар гуруҳи тайинлангач, буни нафақат форс матбуо­ти  қайғу билан қабул қилди, балки Карлуш Кейруш ҳам салбий фикр билдирди. Яъни у ОФКни танқид остига олди: «Ушбу ҳакам Эрон клубларининг ОЧЛ доирасида уй учрашувларини бошқаришдан бош тортганди. Чунки Австралия-2015 (Осиё кубоги)даги иши туфайли эронликлар уни ёмон кўриб қолишган. Шунга қарамай, Эрон термаси иштирокидаги ўйинга айнан шу рефери тайинланди, лекин сафар учрашувига. Агар у ҳалол бўлганида, ҳар қандай ўйинни бошқаришдан чўчимасди. Аммо Бенжамин Эронга келишдан бош тортиб, бошқа мамлакатга боришга рози бўлмоқда. Мантиқан олсак, у Ўзбекистон - Эрон ўйинида ишлашга ҳам кўнмаслиги керак эди, худди ОЧЛдаги ҳолат каби».

2-рақамли инжиқлик. Эрон ФФ президенти устидан шикоят

2014 йил август. Эрон терма жамоасини 2011 йилдан буён бошқариб келаётган португалиялик мутахассис мамлакат футбол федерация­си президенти Али Кафашиённи янги шартнома бўйича келишувга амал қилмасликда айблади. Кейрушнинг аввалги битими ЖЧ-2014дан сўнг ўз кучини йўқотарди. У мундиалдан қайт­гач, форслар билан хайрлашишини эълон қилди, аммо июль ойи ўрталарида фикрини ўзгартириб, 4 йилга мўлжалланган янги шартнома бандлари бўйича келишиб олди. Аммо шарт­номани расмийлаштириш чўзилиб кетди. «Эронга бориб, барча шартлар ва муддат бў­йича келишувга эришдим. Федерация вакиллари билан ўзаро маслаҳатлашиб, эски шартномамнинг бирор бандини ўзгартирмаслик ҳақида ваъдалашдик. Аммо Кафашиён кейинроқ менга янги бандларга эга шартнома жўнатди. Ҳозир ҳаммасини айнан  Кафашиённинг қарори ҳал қилади. У хоҳласагина Эронга учишим мумкин. Хуллас, бу борада ихтиёр ўзимда эмас», - деганди Кейруш.

Якун. Эрон миллий жамоаси бош мураббийи истеъфога чиқмади. Тўғрироғи, мамлакат  футбол федерацияси янги президенти Меҳди Тож унинг аризасини қабул қилмади. Аксинча, португалиялик билан бир неча марта суҳбатлашиш асносида уни терма жамоада қолишга кўндирди. Португалиялик мутахассис шундан сўнг матбуот анжуманида иштирок этди: «Хабарингиз бор, Эрон футбол федерациясидан истеъфо сўрагандим. Аммо жаноб Тож федерация президенти лавозимига сайланганидан кейин мен билан бир неча марта учрашди. Шу учрашувлар самараси ўлароқ, ҳамкорликни давом эттириш бўйича бир тўхтамга келдик. Оддий айтсам, Тож истеъфога чиқиш ҳақидаги аризамни қабул қилмади ва барча муаммоларни ҳал этишга ваъда берди».

3-рақамли инжиқлик. Автобус муҳим, албатта

2013 йил июнь. Қатар-Эрон ўйинидан олдинги матбуот анжуманида форслар бош мураббийи мезбон мамлакат футбол федерациясининг ўз жамоа­сига муносабатини танқид остига олди. Чунончи, Қатар томони Эрон делегациясининг аэропортдан меҳмонхонага етиб олиши учун автобус ажратмаган экан. «Қатарликлар бизни ҳайрон қолдиришди. ЖЧ-2022ни қабул қиладиган мамлакат ҳар бир меҳмон жамоа талабларини қондириши керак»,- деганди жаноб «Моуриньо».

4-рақамли инжиқлик. ФИФА тақвимига нисбатан танқид

2013 йил январь. Карлуш Кейрушнинг фикрича, ФИФАнинг халқаро ўйинлар тақвими футболи ривожланаётган мамлакатлар учун адолатсизликдан бош­қа нарса эмас экан. Чунончи, Эрон миллий жамоасида катта ниятлар билан иш бошлаган мутахассис айрим муаммоларга дуч келганди: «Осиё футболидаги энг катта муаммолардан бири мамлакатлар ўртасидаги масофанинг олислиги билан боғлиқ. Англия, Португалия ва Испания терма жамоаларини бошқарсангиз, бу борада муаммо сезмайсиз. Чунки сафарлар режаси махсус  регламентда кўрсатиб қўйилган. ФИФА талабига биноан, терма жамоа расмий ўйинга 5 кун қолганида тўлиқ таркиб тўплаш ва тайёргарлик кўриш имкониятига эга. Аммо шундан 4 кунини йўлга сарфласангиз, нима бўлади? Ўйинга тайёргарликсиз тушасиз, тамом. Бундай шароитда ишлаш мураббийлик эмас, балки қандайдир афсунгарлик билан шуғулланишдек гап».

Ёдингиздами? Эронликлар 2009 йилнинг 6 июнь куни Пхеньянда КХДР термасига қарши ўйнаб, дарҳол навбатдаги учрашув учун ортга қайтгандилар. Ўшанда жамоа сафарга бориб-келиш учун 8000 км. масофа босиб ўтган. Орадан яна бир ҳафта ўтгач эса, форслар яна сафарга чиқишган - 4070 чақирим йўл босиб, Сеулга етиб боришган ва Ж.Корея термасига қарши тўп суришган. Дарвоқе, форслар якунда ЖЧ-2010 йўлланмасидан қуруқ қолишганди.

5-рақамли инжиқлик. Журналистлар, у билан  ўчакишманг...

2012 йил ноябрь. Эрон миллий жамоаси бош мураббийи эрталаб ташкил этилган матбуот анжуманини тезроқ якунлаб, залдан чиқиб кетишни ўйлади. Ўша анжуманда форс­ларнинг Ўзбекистон термасига қарши ўйинлари муҳокама қилиниши керак эди.  Матбуот анжумани давомида журналистлардан бири микрофонни кўтариб, Кейруш олдига боради. Мураббий эса ундан ўз жойига ўтиришини сўрайди. Аммо журналист мураббийнинг гапига қулоқ солмайди. Бундан жаҳли чиққан португалиялик мутахассис анжуман залини тарк этади.

6-рақамли инжиқлик. Яна қандай баҳоналар бор?

2016 йил апрель. ЖЧ-2018 саралаши учинчи раундига қуръа ташланганидан сўнг Карлуш Кейруш Эрон матбуотида ўз фикрларини баён этди: «Жанубий Кореянинг бир қатор компаниялари Россия мундиалига ҳомий ҳисобланади. Хитойликлар терма жамоани ЖЧ саралаш ўйинларига тайёрлаш учун 50 млн. доллар ажратишди. Қатар ҳақида гапириш ҳам шарт эмас. Кейинги мундиални қабул қиладиган мамлакат катта салоҳиятга эга. Биз эса қўллаб-қувватланишга муҳтожмиз. Аввал айтганимдек, гуруҳда Жанубий Корея ва Қатар термалари фаворит ҳисобланишади. Ўзбекистон ва Хитой жамоалари эса 2-ўрин учун кураш олиб боришади. Вазиятга реал қараш керак. Рақибларимиз муносиб футбол майдонлари ва катта маблағга эгалар. Бу томондан ҳисоб - 2:0. Қатар ва Хитойда миллий чемпионат кучли легионерларга тўла. Бу билан ҳисоб 3:0га етди. Улар ўз мураббийларига ишлаш учун барча шароитларни яратиб беришган - 4:0. Уларда меҳмонхоналар, чартер рейслар ва бошқа шароитлар бўйича ҳеч қандай муаммо йўқ - 5:0. Мен энди ҳисоб 6:5 кўринишида жамоам фойдасига ўзгариши учун қўлимдан келганини қиламан. Бунда мухлисларнинг чинакамига қўллаб-қувватлашлари ва футболчиларнинг тинимсиз ишлашлари муҳим».

Ҳаммаси ўз вақтида бўлади!

Эрон футбол федерацияси миллий жамоанинг 11 октябрь кунига белгиланган Ж.Корея термасига қарши учрашуви (4-тур)ни бир кун олдинга суришни сўраганди. Боиси, 11 октябрь ҳижрий йил ҳисоби бўйича муҳаррам ойининг тўққизинчи куни бўлиб,  шиалар диний байрамларини нишонлашади. Аммо ФИФА ва ОФК Эрон футбол федерацияси илтимосини қондирмади. Демак, ўйин олдиндан белгиланган санада ўтказилади. Ўз навбатида, Ж.Корея футбол ассоциацияси ҳам эронликлар илтимосини қабул қилишмади.

КАРЛУШ КЕЙРУШ

Тўлиқ исм-шарифи: Карлуш Мануэль Брито Леаль Кейруш

Таваллуд санаси: 1953 йил 1 март

Таваллуд манзили: Нампула (Мозамбик)

Футболчилик фаолияти: «Ферровиарио де Нампула» - 1968-1974 (дарвозабон бўлган)

Мураббийлик фаолияти: Португалия ёшлар термаси (U-20) - 1989-1991; Португалия миллий жамоаси - 1991-1993; «Спортинг» (Португалия) - 1994-1996; «Метростарс» (АҚШ) - 1996; «Нагоя Грампус» (Япония) - 1996-1997; БАА миллий жамоаси - 1998-1999; ЖАР миллий жамоаси - 2000-2002; «МЮ» (Англия) - 2002-2003, ёрдамчи; «Реал» (Испания) - 2003-2004; «МЮ» (Англия) - 2004-2008, ёрдамчи; Португалия миллий жамоаси - 2008-2010; Эрон миллий жамоаси - 2011-...

Кейруш мураббий сифатида 3та ЖЧда иштирок этган - 2002 йили ЖАР, 2010 йили Португалия ва 2014 йили Эрон терма жамоалари билан. 2011 йилнинг 4 апрелида Эрон термаси раҳбарияти билан 2,5 йиллик шартнома тузганди. Келишув дастлаб саралаш раунди учун мўлжалланган эди. Кейинчалик шарт­номани узайтириш жараёни бироз чўзилди. Эрон футбол федерацияси Кейрушга маошни тўламаётгани ҳақида ҳам гап-сўзлар тар­қалганди. Айни пайт Осиёда миллий терма жамоани энг узоқ муддатдан буён  бошқараётган мураббий айнан Кейрушдир. Унинг Эрон термаси бош­қарувидаги умумий статистикаси: 66та ўйин, 39та ғалаба, 19та дуранг, 8та мағлубият, тўплар нисбати: 131-40,59 фоиз ўйинда ғалаба.

Фикрат