Инчеондан ёзамиз. 14-кун кундалиги. Олтин кузнинг олтинлари

Эрталаб соат 7:00да, бундан уч кун аввал спорт шаҳарчамизга ташриф буюрган, 70ни қарши олиш арафасида турган, катта тажрибага эка Анвар ака келган эди. Бу операторни Ўзбекистонда билмаган киши йўқ. Ўзбекистон ҳаво йўллари ва якка курашга кирувчи спорт турлари билан мунтазам ҳамкорлик қилиб келаётган устоз, 4та жаҳон Олимпиадаси, 5та Осиё ўйинлари, Марказий Осиё ўйинларининг барчасида ва яна юзлаб мусобақаларда иштирок этганлар. Чамаси 70та давлатда бир неча маротаба бўлганлар. Мана шундай жуда катта тажрибага эга киши билан бир хонадонда истиқомат қиляпман. Авваллари ҳам айтиб келардим, устоз кўришда энг, энг омади чопган инсонлардан бириман. Шунинг учун ёшларга, утозни рақиб деб эмас, ота деб билгин дейман.



ОАВ учун тезкор тамаддихона...

Хуллас Анвар ака эрта тонгда байдарка ва каноэ мусобақасининг финалига борамиз дедилар. Бунинг учун соат 7:00да уйғониш (Тошкент вақти билан 3:00) ва мазкур спорт тури ўтказилиши керак бўлган кўл томон йўлга чиқишимиз керак эди. Йўл узоқ, чамаси 2 соатлик. Соат 10:00да илк чиқиш бошланиши керак эди. Биздан Мочалов ҳеч бўлмаганда кумуш медални ютиши керак. Ёмғир ёғаётганидан бироз хавотирда эдик.  Айни пайтда мазкур спорт турига масъул бўлган Жасур Акрамовни айтишича, ёмғирдан хавфсираш керак эмас, акснча шамолнинг таъсир ёмон бўлиши мумкин. Кўлга етиб борганимизда ёмғир тиниб қолган эди. Натижада ҳосил бўлган туманда мусобақа 1 соатга кечиктирилди. 11:00да дастлабки спортчилар сузиш йўлакчасига чиқишди. Сувдаги расмлар зўр чиқмайдими, шақирлатиб босиб ташладим. 5-рақамда иштирок этаётган Мочаловни  дурбиним қидириш билан банд. Боиси улар 1 км узоқликдан стартга чиққан эдилар. 500 метр қолганида уларни тиниқ кўрдим, Мочалов иккинчи бўлиб келяпти.



Алексей Мочалов кечаги кунни олтин медаль билан бошлаб берди

Сўнгги 250 талик маррага яқин Мочалов “мотори”ни ёқди ва таъқибчисидан ўзиб кетди, биз бақиряпмиз, “Олға, олға”... Ва Мочалов биринчи! Бу финал, ҳақиқийсига Ўзбекистон – Қозоғистон ўртасидаги дерби бўлди. Бўлиб ўтган 10та финалдан 7тасида Марказий осиёликлар  ғалаба қозонишди.
Биринчи стартдан аввал, бир нечта олимпиадани кўриб қўйган қозоғистонлик ҳамкасбларимиз, истасак битта олтинни ҳадя этишларини айтишаётган эди. Биз эса, ўз кучимиз билан ғалаба қозонишимизни жавоб тарзида айтдик. Иккинчи стартда Лондон Олимпиадасини ютиши мумкин бўлган Вадим Менков. У ҳам 5-рақамда. Менковнинг ҳам асосий рақиби қозоғистонлик байдаркачи эди. Худди Мочалов каби Менков ҳам маррани биринчи бўлиб забт этди. Финалдан сўнг уни табриклаб олаётган суратларим, ТВда чиқибди шекили, коментларда ўқиб қолдим. “Жома”ни ҳамма танибди менимча )).



Вадим Меньков ўз "олтин"и билан

Кейинги мусобақаларда бизга сал омад етишмади. Иккита кумуш, битта бронза. Қўшниларимиз эса бир эмас, бешта “олтин”ни чўнтакка солиб кетишди.

Ўзбекистондан 5, Қозоғистондан 15 нафарга яқин журналист мазкур баҳсларни воыеа жойидан ёритишди. Энди кетишимиз керак эди, боиси тунда бизни, бокс, юнон рум кураши ва кўпкураш туридаги енгил атлетика мусобақалари кутиб турар эди. Фотомухбир Анвар ака курашга, мен атлетикага борадиган бўлдик. Боиси иккисида ҳам бизни олтинлар кутаётган эди. Боксда эса чорак финал баҳслари.  Уларнинг олтинини олишга ҳали улгурамиз.



Юлия Тарасова чапда, Екатерина Воронина ўртада...

Аввалига ММС (Медиа марказ)га боришимиз ва у ердан иккита аренага тарқалишимиз керак. Сабаби,” байдарка”дан тўғри рейс йўқ. Икки соат ичида ММСга етиб бордик, у ердан апил-тапил қилиб 10 дақиқа ичида ромиённи (бизнинг ролтон) тиқдик-да, мен атлетикага, устоз курашга кетдик. Атлетикага чамаси 50 дақиқалик йўл. Афсуски, финалнинг сўнгги чиқишига улгура олмадим. Бу ерда ҳайдовчилар айтиб ўтганимдек, ўз йўллари билан эмас, навигатор кўрсатган йўналишда кетаверадилар. Бу сафар яна панд едик. Адашиб бошқа кўчага кириб кетдик. Узоқдан бўлса-да тақдирлаш маросимини суратга олдим. Атлетика баҳслари очилиш маросими бўлган стадионда бўляпти. Сувдаги машъала ҳамон ёниб турибди. Ажойиб кадр. Мен турган нуқтада эса байроғимиз осмон томон кўтарилар эди. Икки нафар қизимиз, Екатерина Воронина ва Юлия Тарасова бизга мусобақадаги олтин ва кумуш медалларни тақдим этдилар. Бу ерда Дарья Резниченко атлетиканинг узоқликка сакраш тури бўйича мусобақадаги иштирокини давом эттираётган эди. Мазза қилиб уни расмга олдим, қумларнинг сачрашини қаранг, эффектмисан, эффект. Афсуски, қизимиз 7-ўрин билан чекланди. Мураббийнинг айтишича, у бизга медал олиб бериши керак эди, аммо стартга уч кун қолганида жароҳат олибди.





Дарья Резниченконинг парвози ва қумлар...

Мусобақада биз спортнинг 32та тури билан иштирок этдик. Шулардан бор йўғи 2-3таси ўзи билан шифокор олиб келган. Бу яхши эмас албатта. Профессионал спорт федерацияларининг ҳар бири ўзи билан шифокор ва уқаловчини олиб юриши керак.

Қайтишда менга ҳам Ўзбекистон спорт делегациясининг экипировкасини беришди. Ишларим ёқди шекили. Ўзбекистон нишони туширилган экипировкани кийсанг, мазза қилар экансан. Бу ҳақда эртага ёзаман.



Давлатимиз байроғи тагида, яна мадҳия садолари остида туриш этларингни жимирлатиб юборади

Дўстим Камол билан спорт шаҳарчасига қайтдик, у ерда яна битта дўстимиз Мумтоз курашдан олтин медал билан келаётган эди. Оғзи қулоғида боланинг. Уйга келсам, энди “Дада” деяётган қизчаси билан суҳбатлашиб ўтирибди. “Тўйлар муборак, азизлар”, деб хонадонимизга кириб келавердим.

Ростан ҳам кечаги кун зўр ўтди, 4та олтин. Олтин кузнинг олтинлари. Сизларга ҳам муборак бўлсин!


29 сентябрь. Жанубий Корея, Инчеон.
Нодирхўжа Юлдашев.