"Ювентус" ҳужум чизиғини нигериялик тўпурар билан кучайтирмоқчи

Туриннинг "Ювентус" жамоаси раҳбарияти "Аталанта"дан нигериялик ҳужумчи Адемола Лукманни сафига қўшиб олмоқчи.

"Tuttosport" хабарига кўра, Турин клуби вакиллари қишки трансфер ойнасида 27 ёшли нигериялик футболчининг трансфери борасида "Аталанта" билан музокара олиб боришга ҳаракат қилади. "Ювентус" Лукманни сербиялик ҳужумчи Душан Влаховичга ўринбосар сифатида кўрмоқда. 

Қайд этиш жоиз, бергамоликлар ёзда нигериялик футболчини Миланнинг "Интер" ва Мюнхеннинг "Бавария" жамоаларига қўйиб юбормаганди. Мутахассислар Лукманнинг трансфер қийматини 60 млн еврога баҳоламоқда.

Эслатиб ўтамиз, Адемола Лукман ўтган мавсум "Аталанта" таркибида Италия чемпионатида 31 ўйин ўтказиб, 15 та тўп киритган ҳамда 5 та голга ассистентлик қилган.