Ифеани Ифеани: "Ҳакамлар хато қилса, тарафини олишади. Биз-чи? Биз ҳам инсонмиз ва хато қиламиз"

- Ифеани нега айнан яна Ўзбекистонга қайтишни хоҳладингиз?

- Аввало, Ўзбекистонда футбол юқори савияда. Бундан ташқари, Осиёда ўзбек футболининг ўрни олдинги қаторларда туради. Қолаверса, олдинги сафар келган пайтимдаги чемпионатдан ҳозирги бўлаётган Суперлига орасида одамни ҳайратга соладиган даражада ўзгаришлар бўлган. Шу сабабли ҳам қайтдим. Яна бир қайтишимга асосий сабаб, "Қизилқум" жамоасидан кетган мураббий Асрор Алиқуловдир. У жудаям яхши инсон. Қолаверса, унинг футболдаги фалсафаси ва тактикалари менга ёқади. Менга таклифни айнан шу мутахассис берган ва мен бу таклифни рад этолмадим.

- Юртдошингиз Виктор Мбаома ҳам сиз орқали "Қизилқум" жамоасига келганми?

- Йуқ. Мен уни танимасдим. Сабаби мен Ироқ чемпионатида тўп тепганман. У эса Жазоирда фаолият олиб борган. Викторни фақатгина мавсумга тайёргарлик пайтида, машғулотларга келганда таниганман.

- Ҳамма жойда янграётган савол. Бу мавсумда "Қизилқум" жамоасига нима бўлмоқда? Натижалар ва карточкалар жуда ҳам кўпайиб кетди. Қолаверса, уларнинг иккитасини ўзингиз қабул қилиб олдингиз...

- Биласизми, "Қизилқум" жамоаси айни вақтда ўзгариш жараёнида. Бундай ўзгаришлар ва натижаларнинг пасайиши дунёдаги топ ва буюк клубларида ҳам бўлади. Мисол учун, мана Англянинг "Челси" жамоасида ҳам ҳеч нима ўхшамаяпти. Сабаби жамоа бутунлигича ўзгармоқда. Бизда ҳам худди шунақа жараён кечмоқда. Ўтган мавсумдаги таркиб деярли бутунлигича алмаштирилган. Шунинг учун ҳам мухлислардан фақатгина сабр қилишларини сўраб қолган бўлардик. Албатта, улар ўзлари хоҳлашгани ғалабаларимиз ҳали олдинда. Бунга биз астойдил ҳаракатдамиз. Қизил карточкаларга келадиган бўлсак, билмадим, ҳакамлар карточка кўрсатиш керак бўлмаган вазиятда ҳам футболчиларни огоҳлантирмоқда. Тўғри, уларни инсон хато қилади, деб тарафини олишди. Лекин биз-чи? Биз ҳам инсонмиз ва хато қиламиз. Агар таҳлил қилиб бир вазиятни кўриб чиқсак. Яъни Суперлига 2-туридан ўрин олган "Қизилқум" ва "Бухоро" жамоалари ўртасидаги учрашувда рақиб футболчиси менга қандай жароҳат етказганини кўришсин. Нега ўшанда ҳакам футболчини ҳаттоки оғзаки огоҳлантирмади. Адашмасам, ўйинда VAR ишлаётганди. Биласизми, бундай хатолар керак эмас. Яна ҳам билмадим.

- Ифеани "Қизилқум" жамоасининг олдинги мавсумларида сизнинг позициянгизда қандай футболчилар тўп тепганидан хабарингиз бордир. Шундай экан, мухлислар сиздан ҳам ана шундай ўйинларни кутишмоқда...

- Албатта, ҳаммасини биламан ва буни ҳис қилмоқдаман. Мухлислар эса бунга ҳақлидир. Мен ҳам улар истаётган ўйинни майдонда кўрсатишга бор кучим билан ҳаракат қилмоқдаман. Жамоамизнинг ашаддий мухлисларидан менга ишонишларини ва мен бу ишончни ажойиб ўйинларим билан оқлайман. Мен бунга ишонаман ва бу ишлар учун кучим ҳам етади.

- Сиз учун айни вақтда Суперлигада топ-даражада ўйин кўрсатаётган футболчи ким?

- Шубҳасиз, "Пахтакор" жамоаси футболчиси Драган Черан. Унинг ақлли ўйинлари ва голлари жамоаси учун анчагина фойда келтирмоқда.  

Шоҳруҳ Мейлихолов суҳбатлашди