Ўзбекистон U-19 чемпионати — Осиёда йилнинг энг яхши ёшлар лигаси

Унда Ўзбекистон Профессионал футбол лигаси томонидан ташкил этиб келинаётган U-19 чемпионати Осиёда йилнинг энг яхши ёшлар лигаси деб эътироф этилди. Мукофотни ОФК бош котиби ўринбосари — Шин Ман Гил Лиганинг Мусобақаларни ўтказиш бўлими бош мутахассиси, U-19 чемпионати менежери — Қудратбек Мадраимовга топширди. Совринни топшириш маросими чоғида айни дамда Жаҳон чемпионатида иштирок этаётган Ўзбекистон U-17 терма жамоаси сафидаги аксарият футболчилар айнан ушбу мусобақада шаклланганини алоҳида таъкидлаб ўтилди.

Мазкур нуфузли мукофот ҳар йили мунтазам равишда топширилади. Сўнгги икки йил давомида бу совринга Япониянинг турли ёш тоифаларидаги лигалари сазовор бўлган эди. Жорий йилда эса ушбу мукофот Ўзбекистон U-19 чемпионатига насиб этди.  

Танловда ғолибни аниқлашда бир қатор мезонлар — мусобақа ташкилотчилиги, йил давомида ўтказилган ўйинлар сони, инфратузилма даражаси, ҳакамлик сифати, мураббийларнинг малакаси ҳамда сўнгги йилларда мазкур чемпионатдан етишиб чиққан профессионал футболчилар сони инобатга олинди. Юқоридаги кўрсаткичлар бўйича U-19 чемпионати Осиёда тенгсиз деб топилди.

Маълумот учун, айни кунларда U-19 чемпионатининг плей-офф ўйинлари марказлашган ҳолда Тошкентдаги "Жар" стадионинг захира майдонида ўтказилмоқда. Финал учрашувига эса "Жар" стадионининг асосий майдони мезбонлик қилади. Бундан ташқари, ўзбек футболи иқтидорларининг энг катта бозори ҳисобланган мусобақанинг кучли футболчилари иштирокидаги баҳслар Лиганинг замонавий кўчма телевизион станция воситасида жонли эфирда Лиганинг YouTube'даги расмий саҳифаси орқали юқори сифатда намойиш этилмоқда.