Ҳамза Каримов: “Андижон”ни олий лигага қайтаришимизга ишонаман”

Асосан олий лигада ўйнаб ўзини кўрсатган тажрибали ўйинчилар таркибга жалб этилди. Ана шундай футболчилардан бири Ҳамза Каримовдир. Биринчи даврани “Нефтчи”да ўтказган ҳимоячи иккинчи даврани водийнинг яна бир клуби – “Андижон”га қўшилгани ўзига яраша шов-шувли бўлди десак муболаға қилмаган бўламиз. Маҳаллий ишқибозлар таркиб кучайтирилаётганидан анча қувонмоқдалар. Каримов эса клубнинг олий лигага қайтишига ишончи катта эканлигини алоҳида таъкидламоқда. Куни кеча футболчи “Андижон” билан шартнома имзолаганидан кейин у билан суҳбатлашишга қарор қилдик.

-   Усмон Тошев менинг биринчи устозим. Менга “Андижон”ни олий лигага олиб чиқиш зарур ва бунда сенинг ёрдаминг керак бўлади, деб айтганидан кейин мураббийга “Нефтчи” раҳбарлари билан гаплашиб олишимни айтдим. Орадан маълум вақт ўтгач, улар билан дўстона равишда хайрлашдим ва “Андижон”га қўшилдим, - деди Каримов.

-   Рости, сизни қачон биринчи лигада ўйнаганингизни эслай олмайман. Тан олиш керак, ўзингизга яраша ҳурматингиз ва номингиз бор. Бундай паллада фаолиятингизни биринчи лигада давом эттиришингиз...
-   Бундан ҳавотирда эмасман. Усмон Қудратович, бир қадам орқага ва кейин икки қадам олдинга деб айтди. Насиб бўлса, “Андижон” олий лигага чиқиб олса, ҳамма ишларимиз янада юришиб кетади. Биз бу ерга жамоани элитага олиб чиқиш учун келганмиз. Бундан бошқа мақсадимиз йўқ. Жамоамиздаги ҳамма ўйинчилар мана шу масъулиятни жуда яхши тушуниб туришибди.

-   “Андижон”га келиб, жамоа ҳақидаги фикрларингиз қандай кўриниш оляпти?
-   Иккинчи даврада яхши жамоа тузиляпти. Энг асосийси, йигитларда ғалабага бўлган иштиёқ катта. Машғулотлардаги хатти-ҳаракатларида шижоатлари юқори эканлигини кўряпман. Шахсан менга “Андижон” жамоаси ёқди. Футболчиларнинг ўз ишига бўлган муносабати ажойиб. Бу ерга келганимдан пушаймон эмасман.

-   “Нефтчи”даги фаолиятингиз ярим мавсум давом этди холос. Сиз билан қишда гаплашганимизда ниятингиз катта эканлигини айтгандингиз. Сизнингча, у ердагиҳаётингиз қониқарсиз кечдими?
-   Қониқарсиз демаган бўлардим. Балки уларга мос келмагандирман ёки аксинча. Бўлмаса у ердаги муҳит менга тўғри келмагандир. Лекин “Нефтчи”да ҳам йигитлар яхши эди. Шунчаки, у ерда алмашинувлар кўп бўлади. Раҳбариятда ва мураббийлар штабида ўзгаришлар кузатилди. Охирги ўринларда юрганимиз учун ҳам жамоага босим кўпроқ бўлди. Аслида клубдан норозичилик жойим йўқ.

-   Умуман, биринчи даврадан кейин “Нефтчи”дан кетмоқчи эдингизми?
-   Усмон Тошев билан биринчи марта гаплашганимдан кейин аввалига “Нефтчи” раҳбарлари билан гаплашиб олишим кераклигини айтгандим. Боя айтганимдек, улар билан ўзаро келишган ҳолда хайрлашдик.

-   “Нефтчи”нинг пастки ўринларга тушиб қолгани чиндан футболчиларга ортиқча босим ўтказгани табиий. “Андижон”га келадиган бўлсак, жамоа биринчи лигада 4-ўринда боряпти ва пешқадам “Цементчи”дан 11 очкога ортда қоляпти. Мақсад эса фақат олий лига! Шуларни инобатга олганда, бу ердаги босим ҳам кучлироқми?
-   “Нефтчи”га қараганда бу ердаги у қадар босимни сезмаяпман. Ўзимни эркин ҳис қиляпман. Ўртадаги 11 очколик фарқ ҳеч нимани ҳал қилмайди. Ҳаммаси ўзимиз истагандек бўлади ва барча ўйинларда ғалаба қозонишга ҳаракат қиламиз. “Андижон”ни олий лигага қайтаришимизга ишонаман. “Нефтчи”да ўйнаганимизда ҳозир ютқазиб қўйсак яна пастга тушиб кетамиз, деган ҳадик ва босим йўқ. Яна такрорлайман: “Цементчи”дан 11 очкога ортда қолиб кетаётганимиз бу ҳеч нима эмас. Биз албатта олий лигага чиқамиз. Чунки ўзимизга бўлган ишонч жуда катта.

-   Гапларингиздан ўзингизга бўлган ишончингиз катта эканлиги шундоқ билиниб турибди. Буни жамоадошларингизга ҳам сингдиришда қийналмаяпсизми?
-   Йўқ. Уларни ҳам мақсадимизга эришиш йўлида ишонтира оламан. Менга ҳам кўп нарса боғлиқлигини билиб турибман. Аммо жамоада яхши йигитлар жамланган. Биз жиддий вазифа учун курашишимизни ҳамма яхши тушуняпти. Шунинг учун барча футболчилар икки ҳисса қўшимча куч билан ишлашяпти. Уларнинг машғулотлардаги ишлаш жараёнига ҳеч қандай эътироз йўқ. Биласизми, мураббий мақсадимиз қанчалик жиддийлигини ва уни албатта бажаришимиз кераклигини барча футболчиларнинг миясига сингдириб қўйган.

-   Боя Тошевни устозим деб атадингиз ва бу ерга келишингизда унинг ҳам ҳиссаси катта. Лекин бундан ташқари, “Андижон”га ўтишингизга яна нима туртки бўлди?
-   Тошев менга олий лигадан биринчи лигага келяпсан, сени ҳам тушунаман деди, аммо ўзим ҳам бу танловнинг амалга ошишини хоҳлагандим. Менга олий лигадан таклифлар кўп эди. Аммо мен “Андижон”ни танладим. Нимага эканлигини эса билмайман. Шунчаки, жамоага ёрдам бериш ниятида келдим. Ахир инсон ҳаётда доим яхшилик қилиши керак-ку. Мен фаолиятимни анча олдин бошлаганман ва доим юқори савияда тўп сурганман. Биринчи лигадан олий лигага чиқсак, бунинг гашти бошқача бўлади.

-   Кўпчилик мухлислар сизни биринчи лигага ўтишингизни савиянгиз билан ҳам боғлашмоқда...
-   Ўзимга ҳам бир нечтаси нимага биринчи лигага кетяпсан деб сўрашди. Мен ўз қароримни эълон қилиб бўлдим. Савиям эса аввалгидек, заррача ҳам ўзгармаган. “Андижон”га келганимдан кейин жамоа яхши эканлигига амин бўлдим. Хоҳиш ва истак бўлса бўлди, сиз ҳамма нарсага эриша оласиз.

ФИРДАВСХОН суҳбатлашди.