Ҳаким Фузайлов: "Пахтакор" маҳорат томонлама биздан устун келди"

- Ўйин ҳақида фикрингиз?

- "Пахтакор" куч жиҳатдан биздан устун, буни тан олиш керак. Улар бугун маҳорат эвазига ютиб кетишди. Рақибни ғалаба билан табриклайман. Афсуски, очко йўқотдик, лекин ҳали кураш тўхтамади. Чемпионат тугашига тўртта тур қолди. Имконият бор экан, охиригача курашамиз ва жамоани Суперлигада олиб қолиш учун бор кучни берамиз.

- Иккинчи бўлимда устунлик "Пахтакор" томонга ўтди. "Хоразм"га нима етишмади деб ўйлайсиз?

- Функционал кучли эмаслигимиз кўринди. Яна бир жиҳат, "Пахтакор"да терма жамоага номзод ўйинчилар кўп ва бу ҳам ўз сўзини айтади. Қолаверса, ироқлик ва эронлик легионери бор, улар ҳам яхши ўйинчи. Бу ҳам ўйинга таъсирини кўрсатди. Афсуски, бизда захира ўриндиғимиз кенг эмас, чемпионат охирларига келиб ўз таъсирини кўрсатмоқда. Лекин "жанг" қилишда давом этяпмиз, ҳеч бир ўйинда қўл қовуштириб қараб турганимиз йўқ. Айтганимдек, жамоамиз келаси йил ҳам Суперлигада ўйнаши учун бор имкониятни ишга соламиз.

- Шаҳрам Самиев кейинги ўйинда майдонга туша олмайди. 

- Ҳа, у қизил карточка олди, бироқ нечта ўйин беришларини билмаймиз. Қаршилик ҳар икки томондан бўлди ва ҳакам ҳар икки жамоа футболчисини жазолади. Комиссия кўриб чиқиб икки ё учта ўйин берса керак.  Вазиятга қараб Аҳроров, Бобожонов, Исмоилов каби футболчиларни майдонга туширамиз.