Футзал. Дилшод Рахматов: “Бизни Хосе Мария Мендез орқали Хитойга таклиф қилишди”

Қуйида ана шу суҳбатни ўқишингиз мумкин.

- Шуҳрат Тожибоев ва сизни Хитойга ким таклиф қилди?
- Терма жамоамизнинг собиқ бош мураббийи Хосе Мария Мендезнинг дўсти шу жамоада бош мураббий экан. Айнан Мендез орқали хитойлик агент бизни таклиф қилди. Хитойликлар “Ардус” билан музокаралар олиб боришганидан кейин бу ерга ўтдим.

- Бош мураббий ким?
- Бразилиялик мураббий, исми Жоао. Тўлиқ исмини ҳозирча билмайман.

- Сизлардан бошқа яна легионер борми?
- Тьяго исмли бразилиялик легионер бор, Осиёдан эса мен билан Шуҳрат ака. Бу клуб янги тузилган экан, бу мавсум биринчиси бўлади.

- Тил масаласичи, таржимон борми?
- Рус тилида гапирадиган таржимон бор.

- Хитойда чемпионат қачондан бошланади?
- Кейинги ойдан старт берилади.

- Қанча муддатга шартнома туздингиз?
- Иккаламиз ҳам 9 ойлик шартномага имзо чекдик. Мен ижара асосида ўйнаяпман, Шуҳрат ака эса клубнинг тўлақонли аъзосилар.



- Машғулотлар қай тарзда ўтмоқда?
- Ўтган ҳафта бир маҳалдан шуғулланган эдик, бугундан эса икки маҳалга кўчирилди.

- Яқинда бўлиб ўтган клублар ўртасидаги ОЧнинг гуруҳ беллашувларида Тошкентнинг “Локомотив” клубини 6:2 ҳисобида мағлубиятга учратган "Шенжен Нанлинг Тиеланг" жамоаси билан ўртоқлик ўйини ўтказибсизлар, қандай натижа қайд этилди?
- Ҳақиқатдан ҳам ўша жамоа билан ўртоқлик ўйини ўтказилди, лекин унда мен йўқ эдим. Шуҳрат ака иштирок этганлар ўша учрашувда ва 3:10 ҳисобида имкониятни бой беришган.

- Клуб олдига қандай вазифа қўйилган?
- Бизни жамоа янги, шунга қарамай учталикка киришимиз керак.


Толибжон Қосимов суҳбатлашди