Дибаланинг ҳаракати "Ювентус" раҳбарларига ёқмади, Аллегри ва футболчи ўртасида жиддий суҳбат бўлади

Гап шундаки, футболчи Италия А Серияси доирасидаги "Парма"га қарши ўйинда захирадан майдонга тушмаслигини билгач, учрашув якунланмасиданоқ кийиниш хонасига йўл олди.

Унинг бу ҳаракати клуб раҳбариятига маъқул келмади. Лекин мазкур иш туфайли клуб футболчини алоҳида жарима ёки жазоламасликни маъқул кўрди.

Бугун жамоа машғулотларга киришади ва бундан олдин мураббий ҳамда футболчи ўртасида суҳбат бўлиб ўтади. Бундан ташқари Дибала клуб раҳбарияти билан ҳам мазкур иш бўйича алоҳида учрашади. Клуб президенти Аньелли Дибалани жаримага тортмоқчи эмас, лекин футболчидан жамоага бўлган муносабатни ўзгартиришни талаб қилади.

"Ювентус" раҳбарияти ҳозирда жамоа учун қийин палла бўлаётгани сезиб, мавсумнинг ҳал қилувчи қисмида жамоа ҳақиқий оилага айланишини ва ҳамжиҳатликда бирлашишини истамоқда.

Эслатиб ўтамиз, "Ювентус" ўтган ҳафтада "Аталанта"га мағлуб бўлиб Италия Кубогидан чиқиб кетди. Шунингдек, "Парма" билан бўлган баҳсда тайёр ғалабани қўлдан чиқарди.