Бу қизиқ! Италия клуби бир кунда иккита мураббийни алмаштирди

Италиянинг тўртинчи дивизионида ўйнайдиган "Пьяченца" клубида антиқа воқеа содир бўлди. Жамоа бир куннинг ўзида иккита мураббийни алмаштирди. Олтита ўйиндан бери ғалаба қозона олмаётган "Пьяченца" клуби эрта тонгдан амалдаги бош мураббий Кармине Парлатонинг истеъфосини эълон қилди. Унинг ўрнига Симоне Бентивольо исмли мутахассис бош мураббий этиб тайинланди.

Жамоа мухлислари бу ўзгаришни умуман қабул қила олишмади ва янги мураббий танловидан норози бўлишди. Симоне Бентивольо қўл остидаги биринчи машғулотдан кейиноқ жамоа мухлислари норозилик намойиши ўтказишди ва агар мураббий ишлашда давом этса, жамоа ўйинларига бойкот элон қилиш билан таҳдид қилишди. Мухлисларнинг бундай норозилигига Симоне Бентивольонинг ўтмиши сабаб. Симоне 2011 йилда келишилган ўйинларда айбланган. Якунда ўз айбига иқрор бўлиб, 13 ойлик дисквалификацияни ўтаганди. 

"Пьяченца" раҳбарияти мухлисларнинг фикрига қулоқ солди ва ўша куннинг ўзида Бентавольони истеъфога чиқарди. Кейин эса жамоага бошқа бир мутахассис – Стефано Россини бош мураббий этиб тайинланди.