"Бешиктош" Иммобиле билан шартномани бекор қилди

"Клуб ва Чиро Иммобиле ўртасидаги шартнома бекор қилинди.

Клубимиз либоси остида қилган меҳнатлари учун футболчига раҳмат айтамиз ва унинг келажагига омадлар тилаб қоламиз", - дейилади клуб баёнотида.

Шунингдек, шартнома икки томоннинг келишуви асосида бекор қилинганини ҳам ёзиб ўтган. Бунинг учун клуб футболчига 2 625 000 евро компенсация пули тўлайди.

Италиялик футболчи ўтган ёзда 3 млн евро эвазига "Лацио"дан "Бешиктош"га ўтганди. Ўтган мавсумда у 41 ўйинда қатнашиб, 19 гол урди.

Эслатиб ўтамиз, "Бешиктош" яқиндагина Тэмми Абраҳамнинг "Рома"дан трансферини эълон қилганди.