Зепп Блаттер Қрим клублари Украина лигаларида ўйнаши кераклигини таъкидлади

«Биз Қрим футболининг Россияга қўшилиши масаласини муҳокама қилганимиз йўқ. Умуман, Қрим масаласи – мураккаб, чунки халқаро нуқтаи назардан Қрим Украинанинг ҳудудий бирлиги», – дейди Блаттер.

«Бу дегани, агар Қрим футбол клублари профессионал лигаларда иштирок этишни хоҳлашса, у ҳолда Украина лигаларида иштирок этишлари мумкин», – дея қўшимча қилди ФИФА президенти.

Аввалроқ, Россия футбол иттифоқи Қрим ва Севастополь футбол федерацияларини ўз таркибига қўшиб олиш тўғрисидаги қарорнинг қабул қилинишини кечиктиргани маълум бўлганди.

Эслатиб ўтамиз, Украинадаги сиёсий инқироз сабаб, Қрим март ойида референдум орқали ўз мустақиллигини эълон қилиб, Россия таркибига қўшилиш истагини билдирган эди. Шундан сўнг Россия Қримни ўз таркибига қўшиб олган, ҳозирги вақтда Қримни Россия билан интеграция қилиш бўйича фаол ҳаракатлар олиб борилмоқда.

Бироқ Қримнинг мақоми юзасидан ўтказилган референдум ҳам, унинг мустақиллик эълон қилгани ҳам, Россия таркибига қўшилгани ҳам халқаро ҳамжамият томонидан ҳам, амалдаги Украина раҳбарияти томонидан ҳам тан олингани йўқ.