Терма жамоамизнинг ҳимоя қўрғони бўлган Ашурматов энди мураббий бўлиб ишлайди

Футболчилик даврида терма жамоамиз либосида 54 бор майдонга тушган Бахтиёр Аъзамович 2013 йилнинг иккинчи ярмидан мураббийлик соҳасида иш бошлаганини яхши эсласангиз керак. Биринчи лигада “Гулистон”ни кучлилар сафига олиб чиққан 38 ёшли мураббий 2013 йили олий лигада курашчан клуб сифатида шакллантира олганди. Бироқ юзага келган молиявий муаммолар туфайли жамоа 2013 йилнинг ўзидаёқ яна қуйи лигага равона бўлганди. Лекин шунга қарамай Ашурматов мухлисларда илиқ таассурот қолдирганди.

Жорий мавсум бошида эса унга ҳаттоки олий лиганинг бир қатор клубларидан қизиқарли таклифлар келиб тушгани бор гап. Чемпионат стартига оз муддат қолган бир пайтда Бахтиёр Аъзамович “Навбаҳор”ни қабул қилиб олди. Мураббий сифатида иккинчи жамоаси бўлмиш “Навбаҳор”да у таркибни асосан маҳаллий футболчилар ҳисобига кучайтиришга эътибор қаратди. Шунингдек бир қатор етакчи ўйинчилар билан таркибни шакллантира олди. Афсуски Наманган клубида ҳам бу йил моддий имкониятлар яхши бўлмаётгани қулоққа чалинмоқда. Олинган маълумотларга кўра, ҳозиргача футболчилар ойлик маошларини олишмаган. Фақатгина 2-3та ўйиннинг мукофот пуллари берилган.

Гарчи вазият шундай бўлса-да, “Навбаҳор”нинг қайд этаётган натижалари мақтовга лойиқдир. Камтарона молиявий имкониятлардан келиб чиқиб, мураббий Наманганда ҳам яна бир рақобатчи жамоа шакллантира олганига гувоҳ бўлмоқдамиз. “Лочинлар”ни айни пайтда турнир жадвалида 5-ўриндан жой эгаллаб туришида табиийки бош мураббийниг ўрни катта.

Мана шундай ижобий фаолиятдан сўнг Ашурматов миллий терма жамоага таклиф этилди. Ўқувчиларимизга яхши маълумки, илгари Қосимов-Ашурматов миллий терма жамоамизда бирга ўйнаган. Эндиликда улар мураббий сифатида ҳам бирга ишлайдиган бўлди.

Маълумот учун:   
Ашурматов Бахтиёр Аъзамович
Туғилган йили: 25 март 1976 йил
Туғилган жойи: Қўқон, Ўзбекистон
Фуқаролиги: Ўзбекистан
Бўйи:187 см
Вазни:85 кг
Лавозими: Бош мураббий
Клуби:“Навбахор”

Футболчилик фаолияти:
1994—1997 “МҲСК”
1997—1999 “Пахтакор”
2000 “Дўстлик”
2001—2002 “Пахтакор”
2003 “Спартак-Алания” 6 (0)
2003 “Торпедо-Металлург  5 (0)
2004—2005 “Пахтакор”
2005—2006 “Крилья Советов”  1 (0)
2007—2009 “Қурувчи”/“Бунёдкор”  62 (1)
2010 “Хоразм”13 (1)
2011—2012 “Локомотив” (Тошкент)
 
Ўзбекистон миллий терма жамоасида
1997—2008 Ўзбекистон  54 (1)[1]

Мураббийлик фаолияти
2012—2013 “Гулистон”
2014— “Навбаҳор”
 

Исломбек Рустамбеков.