Сервер Жепаров: "Ҳеч ким билан шартнома тузмадим, таклифларни ўрганишда давом этаяпман"

Айни пайтда яримҳимоячи билан 2019 йилги мавсумда ўз олдига жиддий мақсад қўяётган суперлиганинг бир қатор клублари жиддий қизиқиш билдиршаяпти. Улар орасида "Металлург", АГМК, "Навбаҳор" каби жамоаларни кўришимиз мумкин.

Жепаров кейинги фаолиятини қайси клубда давом эттиради? Бу ҳақда унинг ўзи шундай дейди:

- Қозоғистондан қайтгач ҳордиқ чиқардим. Энди яна майдонга қайтишга тайёрман. Куни кеча Эрон жамоаси билан шартнома имзолаганим тўғрисида хабар чиқди. Бу тўғри эмас. Сабаби, "Истиқлол"ни мендан қарзи бор. Бундай вазиятда мен улар томонидан таклиф қилинаётган янги шартномани табиийки кўриб чиқмайман. Жамоа мухлисларини ҳурмат қиламан, лекин ҳаммамиз профессионал бўлишимиз керак. Эронликлар мени ўз сафларида кўришни исталар юқоридаги муаммони бартараф этишлари керак.

- Ўзбекистондан Сизга бўлаётган қизиқишлар ҳақида ахборотлар мавжуд...
- Қизиқишлар бўлаяпти ва мен бу ёшда яхшилаб ўйлаб қарор қабул қилишим керак. Фаолиятимни сўнгги йилларини юқори формада ўтказишни истайман. Шунинг учун ҳозирда барча таклифларни яхшилаб ўйлаб чиқаяпман. Якунда бир қарорга келаман ва ўзим ҳамда оиламга мос бўлган таклифни қабул қиламан. Ҳозирча ўз олдига мақсад қўяётган клубларни эшитишга тайёрман.