"Насаф"нинг голи яна инобатга олинмади ёхуд "аждарлар"нинг ўйинида пасайиш

Учрашув ҳақида тўхталадиган бўлсак, авваламбор мезбонларнинг ўйини яхши чиқмаганлиги ва "Металлург" шу куни ўз имкониятларидан тўғри фойдалана олганини таъкидлаш зарур. Бекободликлар бош мураббийи Рустам Мирсодиқов айтганидек, кеча омад уларга кулиб боқди. Бу ҳам бир томондан тўғри. Яъни иккинчи бўлимда қанот ҳаками Ришат Нугманов "Насаф"нинг тоза голини ўйиндан ташқари ҳолатини қайд этиб бекор қилиб қолганди. Бу вазиятни ўйиндан сўнг учрашув назоратчилари кўриб чиқишди ва қанот ҳакамига 4 балл қўйишди. Мактаб баҳосида буни "2" дейилади. Учрашувни бошқариб борган навоийлик рефери Зокир Қодиров ҳам ушбу беллашувни хатоларсиз бошқармади ва унга ҳам қониқарли бўлмаган 7,9 балл қўйилди. Иккинчи қанот ҳаками сифатида ишлаган Владлен Лушинга 7,4 балл берилди. 

Ўйиннинг 63-дақиқасида Ришат Нугманов томонидан йўл қўйилган хато мезбонларга қимматга тушгани бор гап. Лекин бир вазиятда Зокир Қодиров "Насаф" дарвозаси томон пенальти белгиланмаганлиги ҳам ҳақиқат. Учрашувнинг 77-дақиқасига келиб Шаҳзодбек Нурматов "Насаф" ҳимоячиларидан усталик билан қочиб кетаётганда жарима майдончаси ичида йиқитилди. Зокир Қодиров вазиятга яқин турганди. Бироқ навоийлик бош ҳакам пенальти белгилашга жазм этмади. Шу каби хатолари эвазига Зокир Қодиров бошчилигидаги ҳакамлар бригадасига қониқарли баҳо қўйилмади.

"Насаф" жамоасининг ўз уйидаги кетма-кет иккинчи ўйинида киритган голи ҳакамлар томонидан инобатга олинмади. Аввалгисида япониялик Масуко ОЧЛда "Насаф"ни гуруҳ босқичидан олиб чиқиши мумкин бўлган голни ҳисобламаган бўлса, кечаги ўйинда қанот ҳаками Нугманов "аждарлар"ни камида бир очко маҳрум қилди. Албатта бу жамоа мухлислари ва клуб вакилларига алам қилиши табиий. Лекин энди буни ортга қайтариб бўлмайди. Яна бир қизиқ жиҳати шундаки, ҳар иккала ўйинда ҳам "Насаф" дарвозаси томон пенальти белгиланмай қолди. Бунга шунчаки ҳакам хатоси сифатида қараш мумкин.

Натижа йўлида бу каби деталларга эътибор берилиши табиий. Лекин жамоанинг кўрсатаётган ўйинлари ва бир нечта вазиятларни кўкка совураётгани чуқур таҳлил қилишга ундайди. Аввало барча айбни ҳамма ўзидан қидириши керак. "Насаф"нинг ўйинида ижодкорлик, тезкорлик ва футболчиларнинг ҳаракатида совуққонлик йўқолиб бораётгандек. Буни ўз вақтида бартараф этиш лозим. Акс ҳолда жамоа юқорига эмас, пастга шўнғиши аниқ. Ўйиндан кейинги матбуот анжуманида Рўзиқул Бердиев айтиб ўтганидек, жамоада руҳий тушкунлик бордир балки. Лекин "Насаф" ушбу мавсумда Олий лига ўйинларида ўзига ўхшамаяпти. Барча ўрганиб қолган ҳужумкор руҳдаги "Насаф" ўзгарган. Буни ОЧЛдаги иштирок билан ҳам боғласа бўлади. Жамоа халқаро майдонда "ёпиқ" ўйнашга мажбур эди ва бу услубга футболчилар мослашиб қолишгандир. Лекин икки йилдан бери ҳужумкор ўйнашга ўрганган жамоа бирданига ўз ўйинини унутиб қўйиши ҳам мумкин эмас. Масалан кеча "аждарлар" биринчи бўлимни шунчаки майдонда юриб ўтказишди. Иккинчи таймда ҳужумкорлик сал бўлсада ошди. Лекин яна ўша эски муаммо, вазиятлардан унумли фойдаланиш коэффиценти жуда паст. Омад дегани бир ўйинда юз угириши мумкин, ҳа майли боринки иккинчи учрашувда ҳам омад шунчаки кулиб боқмаслиги мумкин. Лекин ҳар доим ҳам юз фоизли вазиятлардан гол ура олмасликни омадга юйиш ҳам адолатдан эмас. Бу маҳорат билан боғлиқ нарса. Рўзиқул Бердиев таъкидлагандек, икки-уч метрдан гол уришни футболчиларга машғулотларда ўргатишни иложиси йўқ. Бу нарса футболчини ўзида бўлиши керак. Жамоа хатолари устида кенг қамровли иш олиб бориши аниқ. Лекин футболчи, ҳужумчи дегани ўз устида персонал равишда ишлаши зарур. Нега гол ура олмаяпман деб ўз-ўзига савол бериб, кейин ўша саволга жавоб излаши керак. Бу борада катта изланув ишларини олиб бориши лозим. Руҳиятини ҳам шунга қараб тўғирлаб бориши керак иложи бўлса. Ўз кучига бўлган ишончни қайтариши лозим. 

"Насаф"нинг ишонган тоғи Артур Геворкян сўнгги ўйинларда кетма-кет юз фоизли имкониятларни кўкка совураётгани ана энди панд жамоага панд беришни бошлади. "Ал Аҳли" билан ўйиндаги вазият, "Навбаҳор"га қарши учрашувдаги имконият ва кечаги вазият. Авваллари Артур Геворкян гол уриб кўп марта "аждарлар"ни қийин ҳолатдан олиб чиқиб кетган ва бу нарса жамоада ҳақиқий ҳужумчи йўқлигини билинтирмай турганди. Артур Геворкян робот эмаски ҳар доим  жамоани қийин вазиятда қўллаб тура оладиган. Унинг бўйнига жуда катта юк юкланди ва бу нарса унинг ўзини ўйинини кўрсатишига ҳам ўз таъсирини ўтказаётгандек. Ҳамма ўз ишини қилиши керак. Шунда қолган футболчилар ҳам майдонда эркинроқ, ижодкорроқ ўйнашлари мумкин.  Олий лигада бошқа жамоалар "Насаф"ни қандай зарарсизлантира олиш йўлларини билиб олишган ва Артур Геворкянни "ўйиндан ташқари" ҳолатда қолдиришса бас, қолганини йўқ қилиш қийин эмасдек.

Бу борада кўп гапирилмоқда, кўп ёзилмоқда. Яна ўша гап, жамоага ҳужумчи керак! Камида биринчи давра якунигача бу борада муаммони ҳал этишни ҳам иложиси йўқ. Борига барака деб туришга тўғри келади. Лекин давралар оралиғида ҳам бу муаммо бартараф этилмаса, унда "Насаф" чемпионликни унутишига тўғри келади. Бу ҳужум чизиғи билан Олий лигада чемпион бўлиш ёки совриндорлар қаторидан жой олиш ҳазил гап эмас. Ўтган йилги чемпионат билан жорий мавсумдагисини ўртасида фарқ катта. Ҳозирча чемпионатимиз аввалгидек эмас, балки бошқача кечмоқда. Охиригача шундай бўлсин!

Шаҳбоз Беғамов