Мухтор Қурбонов: "Футболда 2:0 ҳисобида олдинга чиқиб олиш ғалаба учун жуда яхши имконият, лекин..."

- Нима учун жамоа кечаги ўйинда 2:0 ҳисобида олдинда бораётиб иккита гол ўтказиб юборди?
- Ўзи гол уриш қийин бўлаяпти, иккинчи голни урганимиздан кейин эса ёш болаларча хато эвазига кейинги дақиқадаёқ тўп ўтказиб юбордик. Бу гол "Бухоро"га қўшимча куч бағишлади ва улар иккинчи голни ҳам уришди.

Кечаги ўйинни умумий олиб қараганда биз ғалаба қозонишимиз керак эди. Футболда 2:0 ҳисобида олдинга чиқиб олиш ғалаба учун жуда яхши имконият деб ўйлайман. Афсуски, сўнгги пайтларда шошма-шошарлик ва палапартиш ҳаракат қилиш эвазига оддий вазиятларда голлар ўтказиб юбораяпмиз. Мана шу муаммони бартараф эта олмаяпмиз, балки мен ўйинчиларга бу нарсани сингдира олмаётгандирман. Кеча ҳам худди шу нарса такрорланди. "Бухоро" олий лигада жон сақлаб қолиш учун курашаяпти, иккинчи даврада мураббийлар алмашди. Шу сабабли улардан кучли ўйин кутгандим. Лекин, футболчиларим яхшироқ ҳаракат қилишди. Иккита тўп фарқи билан олдинда бора туриб ўз дарвозамиздан иккита тўп ўтказиб юборганимиз ачинарли бўлди.

- Дисквалификация туфайли ўйинни ўтказиб юборган Игорь Тараннинг йўқлиги билиндими?
- Қайсидур маънода Тараннинг йўқлиги ўз таъсирини ўтказгандир, лекин ҳозир пайтда бир ўйинчини ўрнини бошқа футболчи тўлдира олиши зарур. Бусиз клуб яхши натижага эриша олмайди. Жамоадаги бошқа ҳужумчилар Тараннинг йўқлигини билинтиришмади деб ўйлайман.

Толибжон Қосимов суҳбатлашди