"Милан" клуб ривожланиши стратегисидаги ўзгаришлар ҳақида эълон қилди

"Тез орада "Милан" раҳбарияти билан яна бир учрашув бўлиб ўтади ва унда жамоани Чемпионлар лигасига қайтаришга имкон берувчи янги бизнес-режа мавзуси муҳокама қилинади. Клуб раҳбарияти янги бюджет масаласини ҳам кўриб чиқади. Бу йўналишдаги мақсад - жамоанинг УЕФА молиявий фэйр-плей доирасида рақобатбардошлигини ошириш.

Elliot Management клубга 50 млн. евро миқдорида пул ажратишга тайёрлигини эълон қилди ва "Милан"даги бугунги ўзгаришлар клубнинг келажакдаги муваффақиятларига асос бўлади деб умид қилади" - дейилади "Милан" баёнотида.

Бугун, 21 июль куни Ли Йонхонг "Милан" президенти лавозимини тарк этди, унинг ўрнига Паоло Скарони тайинланди. Россонерлар бош директори Марко Фассоне ишдан бўшатилди, Дэвид Хан Ли, Ли Бо ва Ху Реншуо директорлар кенгашини тарк этишди. Уларнинг ўрнига директорлар кенгашига Марко Патуано, Жоржо Фурлани, Стефано Кочирио, Сальваторе Черчионе, Альфредо Грача, Жанлука Д'Аванцо ва Франк Туил кирди.

Эслатиб ўтамиз, аввалроқ "Милан" қарзлар туфайли Elliot Management фонди қўлига ўтган эди. Ли Йонхонг ўз вақтида Elliot Management фондидан олган кредитини тўлай олмади.