"Жепаровни Суперлигада ўйнашига рухсат бермаслик қонунан инсон ҳуқуқларини поймол қилиш билан баробар" — Шипилов

Кечаги Суперлиганинг янги мавсуми қуръа маросими якунлангач "Металлург" бош мураббийи Андрей Шипиловнинг мазкур жараён ва кутилмаган ўзгариш ҳақидаги фикрлари билан қизиққанимиздан сўнг, жамоанинг янги трансферига айланган Сервер Жепаровнинг мавсум олдидан топширган норматив тестлардан ўтолмагани ҳақида сўрадик. Андрей Шипилов мазкур масала бўйича қуйидаги фикрларни билдирди:

"Биласизми, агарда футболчи тез югуриб қандайдир норматив тестни топшира олмаслиги ҳеч нимани англатмайди. Бу ҳеч қандай кўрсаткич эмас.

Яхшиси, барча унинг ўйинларини томоша қилсин! Жепаровга Суперлигада ўйнашга рухсат беришадими? Биз шунга умид қиламиз. Унинг Суперлигага ўйнашига рухсат бермаслик қонунан инсон ҳуқуқларини поймол қилиш билан баробар! Ҳуқуқий жиҳатдан ҳеч ким Жепаровга футбол ўйнашни тақиқлашга ҳаққи йўқ!

Биз ҳозирга қадар 9 назорат учрашувини ўтказдик. Шу баҳсларда Жепаров ўртача ҳар бир ўйинда 11-13 км масофани босиб ўтмоқда. Масалан, охирги "Бунёдкор"га қарши беллашувда Жепаров 11 км масофани босиб ўтди. Футболчи футбол ўйнаши керак, қуруқ югуришдан нима наф?", - дея гапириб ўтди Андрей Шипилов.