Италия ТЖ собиқ устози мураббийлик фаолиятини якунлади. У 2012 йил Европа вице-чемпиони бўлган

“Иш бўйича баъзи таклифлар бўлди, аммо ҳозир мен орзу қилаётган ягона “ўриндиқ” бу паркда ёнимда невараларим билан ўтириш эканлигини тушунмоқдаман. Мураббийликни тўхтатиб, ҳаётдан завқ олишни истайман”, дея изоҳлаган Пранделли.

65 ёшли мутахассис 2021 йилдан бери ишсиз эди. Унинг охирги жамоаси “Фиорентина” бўлди. Бундан ташқари, у “Женоа”, “Ал Наср” (Дубай), “Валенсия”, “Галатасарой”, “Парма”, “Рома”, “Венеция”, “Верона”, “Лечче”да ишлаган. Мураббийлик фаолиятини эса ўзининг собиқ жамоаси “Аталанта”нинг ўсмирлар жамоасидан бошлаган.

Чезаре Пранделли 2010-2014 йиллар давомида Италия терма жамоаси бош мураббийи сифатида фаолият олиб бориб, 2012 йил Европа вице-чемпиони бўлган, 2013 йил эса Конфедерациялар Кубоги бронза медалини қўлга киритган. У 2009 йил Италияда йил мураббийи деб топилганди.