Ҳаким Фузайлов: "Деярли барча футболчиларим ёмон ўйнашди"

"Олдин ҳам айтгандим, Про лигадаги барча ўйинлар қийин ўтади. "Хоразм" жамоаси бизга қарши ўз майдонида жуда қаттиқ тайёрланишини футболчиларимга уқтиргандим. Бизнинг деярли барча футболчиларимиз жуда ёмон ўйнашди, бир таймдан кўпроқ вақт давомида 10 кишига қарши ҳаракат қилдик ва деярли ҳеч қандай вазият ярата олмадик.

Қизил карточка ҳақида? Тўғриси мен турган жойдан бу вазият жуда узоқда эди. Бу ҳакамнинг қарори, уни муҳокама қилмайман.

Темур Исмоилов ҳақида? Бошида айтдим деярли барча ўйинчиларим ёмон ўйнади дедим. Исмоилов ҳам бошқалар сингари ёмон ўйнади.

Про лига савияси ҳақида? Йиғинлар вақтидаёқ Про лигада барча баҳслар оғир ўтишини тахмин қилгандим. Жуда қийин мусобақа. Ҳозир ҳеч бир фаворитни кўрсата олмайман.

Стадион ҳақида? Ажойиб муҳит. Тўғри майдон ҳолатини янада яхшилаш мумкин. Иссиқда бундай майдонда ўйнаш оғир бўлади. Олдинда ёз фасли бор. "Хоразм" футболчилари бу ерда доим ўйнашади. Муҳитга эса гап йўқ", - дейди Ҳаким Фузайлов.