Дания терма жамоасининг собиқ бош мураббийи Оге Харейде вафот этди

Бу ҳақда VG газетаси мутахассиснинг ўғли Бендик Харейдега таяниб хабар берди.

Маълум қилинишича, 25 ноябрь куни Бендик Харейде отасида мия саратони аниқланганини маълум қилган эди.

Оге Харейде футболчи сифатида Норвегиянинг "Хёдд" ва "Мольде", шунингдек Англиянинг "Норвич" ва "Манчестер Сити" клубларида тўп тепган. Мураббийлик фаолиятини 1985 йилда "Мольде" клубида бошлаган ва жамоа билан 1994 йилда мамлакат кубогини қўлга киритган.

Кейинчалик у Швециянинг "Хельсингборг", "Эргрюте" ва "Мальмё", Норвегиянинг "Русенборг" ва "Викинг", шунингдек Даниянинг "Брондбю" клубларида фаолият юритган. Турли йилларда Норвегия, Дания ва Исландия терма жамоаларига бош мураббийлик қилган. Исландия терма жамоаси унинг охирги иш жойи бўлган. Харейде 2024 йилда мураббийлик фаолиятини якунлаган.

Мутахассис "Хельсингборг" (1999) ва "Мальмё" (2014) билан Швеция чемпиони, "Брондбю" билан Дания чемпиони (2002), "Русенборг" билан эса Норвегия чемпиони (2003) бўлган. Шунингдек, у "Хельсингборг" билан Швеция кубогини (1998), "Русенборг" билан Норвегия кубогини (2003), "Мальмё" билан эса Швеция Суперкубогини (2014) қўлга киритган. 2014/15 йилги мавсумда "Мальмё" илк бор Чемпионлар лигаси гуруҳ босқичига чиққани ҳам Харейде номи билан боғлиқ. У Швеция, Норвегия ва Дания чемпионатларида ғолиб чиққан ягона мураббий ҳисобланади.

Оге Харейде бошчилигида Дания терма жамоаси 2018 йилги жаҳон чемпионатининг финал босқичига йўл олган. Россиядаги мусобақада данияликлар гуруҳда иккинчи ўринни эгаллаб, биринчи поғонани кейинчалик Жаҳон чемпиони бўлган Франция терма жамоасига бўшатиб берган. 1/8 финалда эса Дания Хорватияга пенальтилар сериясида мағлуб бўлган (1:1, пенальтилар — 2:3).