Артур Юнусов: "Тай Сон Нам" олдига ОЧЛда ютиш вазифаси қўйилган"

Бу ҳақда аввалроқ хабар берган эдик. Артурнинг ана шу турнир ҳақидаги фикрлари билан қизиқдик.

"Бу ҳар йили одатий тарзда ўтказиб келинадиган турнир. Уни Вьетнам футзал ассоциацияси президенти ташкиллаштиради, жуда яхши савиядаги турнир дейиш мумкин.

Турнирда 8 жамоа 2 гуруҳга бўлинган ҳолда беллашди, иштирокчиларнинг барчаси Вьетнам олий лигаси клублари.
Турнир жуда яхши ўтди, бу бизнинг жамоа учун клублар ўртасидаги Осиё чемпионлар лигасига яхши тайёргарлик бўлди десам ҳам бўлади. Ҳозир ўйин амалиёти жуда муҳим.

Финалда биринчи голни урдим, финалда тўп киритиш насиб қилганидан хурсандман. Ўйин қийин кечди, гуруҳ босқичида шу жамоага 2:5 ҳисобида мағлуб бўлган эдик.

"Тай Сон Нам" клуби олдига Осиё чемпионлар лигасида ғалаба қозониш вазифа қилиб қўйилган, менимча ушбу мусобақага келадиган ҳар бир жамоа фақат битта мақсад билан иштирок этади".

Толибжон Қосимов ёзиб олди