43 ёшигача тўп тепган, Ўзбекистоннинг икки карра энг яхши футболчиси Павел Бугало 46 ёшда!

Бугун ўзбек футболи тарихида ёрқин из қолдира олган, бир нечта рекордлар соҳиби, 43 ёшигача тўп тепган тажрибали дарвозабон Павел Бугало таваллуд топган кун. Павел Викторович бугун 46 ёшга тўлди. 

Эътиборлиси, Бугало туғилган куни ҳам яшил майдонда! Бундан бир неча дақиқа аввал "Оқ-Тепа" ва АГМК жамоалари ўртасидаги Ўзбекистон кубогининг чорак финал учрашуви якунланди. Еттита гол киритилган учрашувда 4:3 ҳисобида ғалаба қозонган олмалиқликлар ярим финалга йўл олишди ва бу билан КУБОК ҳимоясини давом эттиришди. Бу ўйиннинг Пашага нима алоқаси бор, дедингиз-а? Бугало бугунги кунда айнан АГМК жамоасида дарвозабонлар мураббийи сифатида ишлаяпти. Миржалол Қосимов бир пайтлар бир неча йил терма жамоа таркибида бирга ўйнаган Бугалога мураббийлар штабида ишонч билдирди.  

Миржалол Қосимов, АГМК бош мураббийи

"Паша билан кўп йил бирга ўйнадик ва бугунги кунда ҳам бир жамоадамиз. У ҳақда кўп гапириш мумкин. Футболга меҳри сабаб 43 ёшигача майдонда тўп тепди. Ҳаётда ҳам ажойиб инсон. Табиатан анча босиқ, камтар ва камгап. Ишончим комил, ундан яхши мураббий етишиб чиқади. Ўзи сингари машҳур, совриндор дарвозабонларни терма жамоаларимизга тайёрлаб беради. Фурсатдан фойдаланиб, Павел Бугалони бугунги туғилган куни билан жамоамиз номидан табриклайман. Бугунги ғалабамизни унга бағишлаймиз".

Павел Бугало ҳақида кўп ва хўп гапириш мумкин. Ҳақиқатан ҳам, исм-шарифи катта харфлар билан ёзиладиган дарвозабонимиз бир футболчи эришиши мумкин бўлган муваффақиятлар соҳибидир. У профессионал футболчилик фаолиятини 1991 йили "Чирчиқ" жамоасида бошлаган. Кейинчалик "Пахтакор", "Алания" (Россия), "Женис", "Жетису", "Ордабаси" (уччаласи Қозоғистон), "Бунёдкор", "Андижон", "Локомотив" клублари шарафини ҳимоя қилди. Бугало 1992 йили илк маротаба ўтказилган Ўзбекистон чемпионатида иштирок этиб, 2017 йилгача олий лигада тўп тепган ягона футболчи ҳисобланади. 

У шунингдек, Ўзбекистоннинг икки карра энг яхши футболчиси (1996, 1997) деб топилган ягона дарвозабон ҳамдир. Павел "Пахтакор" (1992, 1998) ва "Бунёдкор" (2008) жамоалари таркибида уч карра Ўзбекистон чемпиони бўлган. 1993 ва 1997 йилларда "Пахтакор", 2008 йили эса "Бунёдкор" сафида Ўзбекистон кубогига эга чиққан. 2002 йилда "Женис" клуби билан бирга Қозоғистон кубоги соҳиби ҳам бўлган. 1995-2007 йиллар оралиғида Ўзбекистон миллий терма жамоаси шарафини ҳимоя қилган. 

Ўйлаймизки, Павел Бугалонинг мураббийликдаги фаолияти ҳам ёрқин давом этади. Бундан кейин ҳам янгидан-янги дарвозабонларни етишиб чиқишида унинг бой тажрибаси асқотишига шубҳа йўқ. Бугун 46 ёшни қарши олган Павел Бугалони АГМК раҳбарияти, мураббийлари, футболчилари, барча ходимлари, сайтимиз ижодкорлари ва мухлислар номидан қизғин муборакбод этамиз. Унга оилавий тинчлик, соғлиқ, бахт-саодат тилаймиз.

Видео. Ўзбекистонда йилнинг энг яхши футболчиси бўлган ягона дарвозабон Павел Бугало билан суҳбат