ЖЧ-2014. Финал. Германия — Аргентина. ПРЕВЬЮ

Бразилия ва Голландия ўртасидаги учинчи ўрин учун кечган беллашувда голландлар 3:0 ҳисобида ғалаба қозонишди. Шундай қилиб бронза медал соҳибини аниқлаб олдик. Энди эса битта савол қоляпти: ким жаҳон чемпиони бўлади? Германиями ёки Аргентинами?
 
Ҳар иккала жамоа учинчи марта мусобақанинг финалида ўзаро тўқнаш келмоқда. Албатта, бунақаси футболда камдан кам рўй беради. Аргентина 1986 йилги мусобақада зафар қучган бўлса, Германия 1990 йилги турнирда ғалаба қозонган. Демак, тарози палласи ҳозирча тенг. Лекин бугунги беллашувдан кейин тош қайсидир жамоанинг фойдасига оғир босади.



Германия мазкур жаҳон биринчилигида жуда яхши таассурот қолдирди. Айниқса ярим финалда уларнинг Бразилия устидан 7:1 ҳисобида ғалаба қозониши бутун дунё футбол жамоатчилиги эътиборини ўзига тортди. Мана шу натижадан келиб чиққан ҳолда кўпчилик немисларни финал фаворити дейишмоқда. Аммо иккинчи томондан бу - финал ва унда ҳамма нарса рўй бериши мумкин.

Йоахим Лёв охирги икки ўйинда бошланғич таркибни ўзгартирмади. Франция ва Бразилия билан ўйинларда мураббий бир хил бошланғич таркибни майдонга туширди. Финал учрашувида ҳам шундай бўлиши мумкин. Немислар устози ҳимоя марказида Боатенг - Хуммельс жуфтлигини маъқул кўрмоқда. Филипп Лам эса қанотда ўйнайди. Майдон марказида Хедира билан Швайнштайгер ўйнайди, Клозе яққол ҳужумчи вазифасини бажарса, Томас Мюллер қанотларда тўп тепади. Мертезакер, Гётце, Шюррле ва бошқалар захирада қолса керак.



Германия дабдаба билан финалга чиқиб келган бўлса, Аргентина жимгина етиб келди. Кўпчилик бу жамоанинг финалга чиқишини кутмаганди. Буни аргентиналик футболчиларнинг ўзлари ҳам матбуот орқали айтиб ўтишди. Лекин буёғи соврингача бир қадам қолди ва Аргентина ғалаба қозониш бор кучини ишга солиши турган гап. Терма жамоа устози олдида таркиб борасида муаммолар йўқ эмас.  Алехандро Сабелла турнир давомида таркибни бир неча бор янгилаб турди. Демикелис, Энцо Перес, Лавесси сингари футболчиларни ҳам туширди. Голландия билан кечган ярим финал баҳсида Серхио Агуэро жароҳатидан тузалиб ҳартугул охирги дақиқаларда майдонда кўриниш берди. Лекин Анхел Ди Мариянинг аҳволи ҳалиям яхши эмас. У бугун асосий таркибда ўйнай олмайди. Шунингдек, Фернандес, Родригес, Гаго ҳам захирадан жой олишади.



ЖЧ-2014. Финал
ГЕРМАНИЯ — АРГЕНТИНА
Рио-Де-Жанейро. “Маракана” стадиони.
Бош ҳакам: Никола Риццоли (Италия)

Тахминий таркиблар

Германия: Нойер — Лам, Боатенг, Хуммельс, Хеведес — Хедира, Швайнштайгер — Мюллер, Кроос, Озил — Клозе

Аргентина: Ромеро — Сабалета, Демикелис, Гарай, Рохо — Маскерано, Билья, Перес — Месси — Агуэро, Игуаин



Финални бир киши ютиши мумкин эмас. Шундай экан, бугун Мессига осон бўлмайди. Бунинг устига рақиб кимсан Германия. Аммо замонавий футболда бир ўзи кўп ишни уддалайдиган футболчи бор бўлса, бу ҳам Мессидир. Мусобақа давомида Аргентина фақат Мессидан иборат, жамоа унингсиз ҳеч нарса қила олмайди каби гаплар кўп айтилди. Лекин ярим финалда кўрдик, бошқалар Мессидан кўпроқ югурди, кўпроқ ҳаракат қилди. Месси яққол ажралиб тургани йўқ. Дарвозабон Ромеро, ҳимоячилар Гарай, Рохо, Демикелис, ярим ҳимоячилардан Маскерано нисбатан кўпроқ тер тўкишди. Шундан келиб чиқиб Аргентина жамоавий ўйин намойиш этмоқда дея оламиз.
 
Финалдан олдинги фикрлар

Йоахим Лёв (Германия термаси бош мураббийи):
“Мен Аргентинадан қўрқмайман. Агар ўзимизнинг энг яхши ўйинимизни кўрсата олсак, уларни мағлуб этамиз”.

Алехандро Сабелла (Аргентина термаси бош мураббийи):
“Германия ҳар доим жисмонан ва тактик жиҳатдан кучли бўлиб келган. Шу боис ҳам бу жамоа Бразилия ва Италия билан бирга энг кўп совринни ютган. Улар тўп билан яхши ишлашади. Биз яхши ўйин кўрсатмасак, Германияни мағлуб эта олмаймиз”.

Лионель Месси:
“Финалгача етиб келишимизни билардик. Лекин менинг орзум ҳали ушалгани йўқ. Чунки жаҳон чемпиони бўлишни истайман. Барчамиз бунга тайёрмиз”.



Хавьер Маскерано:
“Финалга чиқдикми, охирги ўйинда бор кучни берган ҳолда ғалаба қозонишга ҳаракат қиламиз. Биз учун бир қадам қолди. Нима бўлишини эса вақт кўрсатади”.

Бастиан Швайнштайгер:
“Босим остида турибмиз деб ўйламайман. Таркибимизда катта ўйинларни кўрган футболчилар етарли. Бизда жаҳон чемпионати финалида ўйнаган битта ўйинчи бор, энди эса кўпчиликни  ташкил этамиз”.

Ўзаро ўйинлар 20 учрашув: +6=5-9 28:28
ЖЧлар доирасида: +3=2-1
Охирги баҳс: 15.08.2012. Германия — Аргентина 1:3 (Хеведес — Хедира-автогол, Месси, ди Мария)



Қизиқарли фактлар
-   Европа жамоалари шу пайтгача Жанубий Америкада ўтказилган мундиалларда ғалаба қозонмаган
-   Германия терма жамоаси ўз тарихида саккизинчи марта финалда ўйнайди.
-   Охирги тўртта финалдан учтасида Германия имкониятни бой берган. Ягона ғалаба 1990 йил айнан Аргентина устидан қўлга киритилган.
-   Германия қаторасига 17 ўйиндан бери мағлубият нималигини билмаяпти.
-   Аргентина жаҳон чемпионатининг плей-офф ўйинларида бирортаям гол ўтказиб юбормади.
-   Аввалги икки ЖЧда Аргентина айнан Германияга ютқазиб мусобақадан чиқиб кетган, лекин бу воқеалар чорак финалда рўй берганди.

Хайрулла Холиқов.