Жанубий Корея мураббийи: “Фақат Россия эмас, бошқалар ҳам кучли”

Албатта, биз учун Осиё жамоаларининг қайси гуруҳдан жой эгаллашини кузатиш қизиқ бўлди. Саралаш ўйинларида Ўзбекистон билан бир гуруҳдан жой олган Жанубий Корея ЖЧ-2014да “Н” гуруҳига тушди.

Корейслар гуруҳда Бельгия, Жазоир ва Россияга қарши баҳс олиб боришади. Ж.Корея бош мураббийи Хонг Мёнг Бо қуръа борасида қуйидаги фикрларни билдирди:

“Одамлар бизни осон гуруҳга тушди дейишяпти, лекин аслида бундай эмас. Бизнинг ҳеч бир рақибни камситишга ҳаққимиз йўқ. Чунки гуруҳимизда осон рақибни кўрмаяпман”.

Ж.Корея 17 июнь куни Россияга билан куч синашади, улар ўтган ой ўзаро ўртоқлик учрашувини ўтказишди ва бунда руслар 2:1 ҳисобида ғалаба қозонишди.

“Ҳа, биз улар билан ўртоқлик ўйнадик, лекин жаҳон чемпионатигача анча бор ва бу вақт оралиғида рақиб ўйин услуби ўзгариб кетиши мумкин. Биз уларни ўрганишда давом этамиз. Биз эътиборни фақат Россияга эмас, балки Бельгия билан Жазоирга ҳам қаратамиз” – дейди кореяликлар устози Хонг Мёнг Бо.

Хайрулла Холиқов тайёрлади.