Зафар Полвоновнинг майдонга тушмагани, Ўзбекистондаги ҳужумчилар муаммоси, "Шўртан"нинг мақсади - Анвар Бердиев "Локомотив"га қарши ўйиндан кейин нималар деди?

- "Локомотив" жамоасини ғалаба билан табриклайман. Яхши қизиқарли ўйин бўлди. Учрашув охиригача курашдик, бироқ баҳс якунида концентрацияни йўқотиб қўйиб, аламли гол ўтказиб юбордик. 

- "Шўртан"ни йилдаги энг яхши ўйинини ўтказди деса бўладими?

- Йўқ, ундай демаган бўлардим. Бу "Шўртан"нинг мавсумдаги энг яхши ўйини эмас. Яхши ўйнаса жамоа ғалаба қозониши керак. Биз мағлубиятга учрадик. Энди буни ёддан чиқариб, кейинги ўйинларга тайёрланишимиз лозим. 

- Ўтган турда Зафар Полвонов учта гол урганди. Бироқ у бугун захирада қолдирилди.

- Зафар Полвонов - ёши катта футболчи. Бугун "Локомотив"га қарши ўйинда бошқачароқ схемада ўйнашни ўйлагандик. Шу сабабли Зафар билан гаплашиб, ундан иккинчи бўлимда фойдаланмоқчи бўлгандик. Ўйинни кўрдингиз, бугун ҳар бир футболчидан жуда кўп жисмоний куч талаб қиларди. Шунинг ҳисобига бугун Зафар Полвоновни асосий таркибда майдонга туширмадик. Кейинги ўйинларда у яна майдонга қайтади. 

- Мавсум тугашига 3 тур қолганида "Шўртан"нинг асосий мақсади қандай? 9 очко тўплаб, ўтиш турнирига йўлланма олишми?

- Албатта, биз ҳар бир ўйинга ғалаба учун майдонга чиқамиз. Имкониятимиз бор экан, охиригача курашишни давом эттирамиз. Мақсадимиз - кучли бешликдан тушиб кетмаслик ва ўтиш турнирида иштирок этиш. Бунинг учун курашишда давом этамиз. 

- Ўзбек футболида нега Анвар Бердиевга ўхшаган ҳужумчи чиқмаяпти?

- Бўлади, бунга ишонаман. Биздан зўр ҳужумчилар бўлган. Ўзбекистонда иқтидорли футболчилар жуда кўп. Фақат улар билан ишлаш керак. Яна бир бор қайтараман, агарда мураббий футболчиликда ҳужумчи бўлмаган бўлса, жамоада ҳужумчилар билан ишлайдиган мураббий бўлиши керак, бу менинг шахсий фикрим. Машғулотларда ҳужумчи ҳар бир кичик деталларгача эътибор қаратиши керак. Шундай бўлса Ўзбекистондан яна яхши ҳужумчилар чиқишни бошлайди.