“Водий футболи”. Илья Ильин “Металлург”га қарши ўйинни ўтказиб юборади

“Андижон”: Кеча ўртоқлик ўйини ўтказилди

“Андижон” жамоасининг олий лига 12-тур баҳсида Жиззахнинг “Сўғдиёна” клубига қарши ўйинга тайёргарлиги давом этмоқда.
Кеча “Соғлом авлод” стадионида Эдгар Гесс шогирдлари Андижон олимпия захиралари коллежи тарбияланувчиларидан иборат жамоага қарши назорат учрашувида майдонга тушди. Ушбу учрашувда Эдгар Гесс асосий таркибдаги барча футболчиларни синовдан ўтказди. Ўйинда тажриба ўз сўзини айтди ва “Андижон” 6:1 ҳисобида ғалаба қозонди. Лочин Солиев хет-трикка эришган бўлса, Абдумалик Абдуллаев дублни қайд этди. Шунингдек, Расул Раҳмонов ҳам ўз ҳисобига битта гол ёзиб қўйди.


“Қўқон-1912”: Илья Ильин “Металлург”га қарши ўйинни ўтказиб юборади

Маълумки қўқонликлар 6 июнь, шанба куни сафарда Металлург билан куч синашади. Бўлажак баҳс олдидан “Қўқон-1912” таркибида битта йўқотиш бўлиб, ҳимоячи Илья Ильин бекободликларга қарши ўйинни ўтказиб юборади.
Боиси 30 ёшли футболчининг сариқ карточкалари сони 4тага етди.


“Навбаҳор”: Юрий Рижко кеча якка тартиб шуғулланди

Наманганликлар кеча ўз қароргоҳида йиғилди ва навбатдаги учрашувга тайёргарликни бошлади. Бахтиёр Ашурматов бошчилик қилган машғулотда жами 23 нафар футболчи иштирок этди. Енгил жарохати борлиги сабабли ҳимоячи Юрий Рижко кеча якка тартибда шуғулланди. Бу унинг “Бухоро” билан учрашувни ўтказиб юборади дегани эмас.


“Нефтчи”: “Олмалиқ” билан ўйинга чипталар эртадан сотувга чиқади

Хабарингиз бўлса керак, фарғоналиклар 7 июнь, якшанба куни ўз майдонида “Олмалиқ”ни қабул қилади. Бўлажак баҳс “Истиқлол” стадионида 18:00да старт олади. Чипталар эса эртадан сотувга чиқади. Бу ҳақда стадион директори Илҳомжон Сабидов сайтимизга хабар берди.