Виктор Карпенко: "Муросасиз учрашув гувоҳига айландик"

- Ўйин ҳақида

- Бугун муросасиз учрашув гувоҳига айландик – 6 та гол, 2 та четлатиш. Ўйлайманки, учрашув мухлисларга ёқди. Икки жамоа ҳам ғалаба учун борини берди. Кўпроқ бизга омад кулиб боқди. "Металлург"га кейинги ўйинларда омад тилайман.

- Пенальти белгиланганда, уни ким ижро этиши олдиндан аниқлаб олинганмиди? 

- Ҳа, кўрганингиздек, бугун ҳеч қандай муҳокама бўлмади. Ўйингача аниқлаб олгандик. Шу боис Жўраев тепди ва гол урди. 

- "Бунёдкор" кейинги икки ўйинни ўз уйида "Бухоро" ва "Сурхон"га қарши ўтказади. Шу ҳақда фикрларингиз...

- Биз уй ўйинми, меҳмон ўйинми, ажратмаймиз. Ҳар бирига жиддий ёндашамиз. Фақат ғалаба учун майдонга тушамиз.

- Таркибда кўплаб ўзгаришлар бўлди...

- Ҳа, ротацияга қўл урдик. Кўпчиликка имконият бердик. Ҳеч ким таркибдан тушиб қолмади. 

- Бу катта таваккал эмасмиди?

- Ҳар бир ўйин хавф туғдириши мумкин. Биз бир жамоамиз ва 23 футболчи ўйнашга қодир. Асосий таркиб, иккинчи таркиб сифатида ажратмаймиз. Ҳар бир футболчи саралаб олинган ва ҳар қандай вақтда жамоа сафида ўйнаши мумкин бўлади.