Трансфер ойнаси-2022: охирги куннинг муҳим трансферлари таҳлили (мутолаа учун)

Чиндан муҳим трансферлар ҳам амалга оширилди, жумладан, Дарвин Нуньес ("Ливерпул"га 75 млн евро эвазига), Каземиро (70 млн еврога "Манчестер Юнайтед"га) ва Эрлинг Ҳоланд (60 млн еврога "Манчестер Сити"га) топ-клублар аъзосига айланди.

Кўпгина лигалар учун ушбу трансфер ойнаси пайшанба куни ниҳоясида ёпилиши керак эди (бу ерда, албатта, маҳаллий вақт инобатга олинади). Белгиланган муддат дедлайндан аввал яна бир қанча йирик трансферлар ҳам амалга ошиши мумкин эди. Бу хоҳ йирик суммадаги трансфер бўлсин, хоҳ узоқ вақтдан буён нархини келиша олмай савдолашиш бўлсин ёки ижара асосида футболчиларни бериб юбориш.

1 июлда трансфер ойнаси очилганидан бери деярли ҳар бир битимнинг жамоа ўйинига таъсири ва футболчининг икки жамоада тутадиган ўрни қандай бўлгани ва қандай бўлиши борасида мулоҳазалар бериб борилди. Энди сўнгги бир неча кун ичида расман эълон қилинган бир қатор муҳим аҳамиятга эга келишувларга таҳлилий баҳо беришга уриниб кўрамиз. Трансфер маблағлари миқдори ва расмийлаштирилган санасига кўра уларни жойлаштирдик. Келишувларнинг аниқ миқдори маълум қилинмаганларини махсус белги – юлдузча (*) билан белгиладик.

1 сентябрь

Антони – "Аякс"дан "Манчестер Юнайтед"га – 95 млн евро (85 млн фунт, 96 млн доллар)

"Аякс": A+

МЮ: A-

Трансфер бозори устаси бўлган "Аякс" бразилиялик вингерни 2020 йилда тахминан 18 млн еврога сотиб олган эди ва футболчининг трансферидан катта фойда қилди. Клуб манкунианлардан кўплаб таклифлар келганини кўриб, ўзлари истаган маблағни талаб қилган ҳолда қаттиқ туриб олди ва қўшимчасига 5 млн ҳам ишлаб олиши мумкин бўлган битимга розилик билдирди. Унга мос қобилиятли ўринбосар топиш учун яна узоқ муддат ишлаш керак бўлади. 

22 ёшда бўлган Антонининг янада ривожланиш учун кўп вақти бор ва у Эрик тен Ҳаг қўл остида ривожланиши керак бўлган энг яхши ёш истеъдод эканига шубҳа йўқ. 95 млн евро эса ундан кутилганларини рўёбга чиқариш учун анча кўплик қилади. У ушбу маблағни оқлаш ва Премьер-лигада муваффақият қозониш учун барча имкониятларга эга.

Пьер-Эмерик Обамеянг – "Барселона"дан "Челси"га – 12 млн евро* (10 млн фунт, 12 млн доллар)

"Барса": А-

"Челси": С+

Февраль ойи бошида Обамеянгни текинга қўлга киритиб "Барса" қисқа вақт ичида унинг асосан яхши формада бўлганидан унумли фойдаланди. Аммо ёзда Роберт Левандовски билан шартнома имзолангандан сўнг молиявий аҳволини яхшилаш учун форвардни "Челси"га бериб юбориш орқали яхшигина даромад қилди. Ақлли юриш, сабаби у Хавини унчалик ҳайратда қолдира олмаган ва фақатгина Левандовски жароҳат олса (бундай бўлмаслигига умид қиламиз) унинг ўрни билиниши мумкин. "Челси" бир ҳужумчи билан шартнома имзолашни астойидил истади. Бироқ Обамеянгда тўхталиш хато бўлиб чиқса-чи? Шубҳасиз, у Дортмунднинг "Боруссия"си орқали жамоа мураббийи Томас Тухелни яхши билади ва у Премьер-лигада гол ура олишини исботлаб бўлган. Бироқ 33 ёшли футболчи учун бир ўйинчининг баҳридан ўтиш ва 12 миллион тўлаш, назаримизда, жуда кўп. Унинг февраль ойида "Арсенал"ни тарк этиши хавф ишораси бўлиши керак.

Денис Закария – "Ювентус"дан "Челси"га – ижара асосида

"Юве": C+

"Челси": B

Январь ойида текинга Турин клуби аъзосига айланган футболчи айтарли натижа кўрсатмади. Унинг ижарага ўтиши кутилмаганда пайдо бўлди, аммо 35 миллион еврога уни доимий қўлга киритиш имконияти ҳам бор. Агар бу амалга ошадиган бўлса, "Ювентус" жуда самарали ишлаган бўлиб чиқади. 

Н'Голо Кантенинг жароҳат олиши "Челси"ни трансфер бозорига ярим ҳимоячи излаб киришига олиб келди ("кўклар" шундоқ ҳам бу бозорга ётиб олганди) ва муносиб ўринбосарга айланиши мумкин бўлган Закарияни топишди. Бироқ сиз "Челси" уни қанчалик хоҳлаганини трансфер ойнасининг қайси вақтида олинганидан билиб олишингиз мумкин.

Карлос Солер – "Валенсия"дан ПСЖга – 18 млн евро (18 млн доллар)

"Валенсия": C-

ПСЖ: B

"Валенсия" юлдузларидан бири ҳисобланган Солер трансфер ойнасида у учун тўланганидан икки баравар келадиган жуда кўплаб таклифлар берилгани ҳақида хабарлар чиққанди. Шу туфайли 18 млн евро узун бўйли 25 ёшли ўйинчи учун жуда камдек кўринади.

Худди Фабиан Руис билан келишув тузилгани каби ПСЖ футболчининг 2023 йилда тугайдиган шартномасидан фойдаланиб кутилганидан анча арзонга футболчини қўлга киритди. Солер иқтидорли ўйинчи, бироқ у супер юлдузлар билан тўлиб тошган таркибни ёриб ўтишга қийналиб қолади.

Мануэль Аканжи – "Боруссия" Дортмунддан "Манчестер Сити"га – 17,5 млн евро (15 млн фунт, 18 млн доллар)

"Боруссия": B+

"Сити": B

Швейцариялик футболчининг немис клубидаги шартномаси келаси ёзда ўз якунига етиши керак эди, дортмундликлар иложи борича унинг трансферидан пул ишлаб олишга интилди. Аканжи 2018 йилда "Базел"дан 18 млн еврога келганидан бери яхши ҳаракат қилди ва "Сити", шубҳасиз, кўрганларидан мамнун бўлиб, футболчига қизиқиш билдирди.

Аканжининг "Сити"да автоматик тарзда асосий ўн бирталик учун курашга қўшилиши даргумон. Бундан аввал футболчи билан "Челси" ва "Арсенал" қизиқиб кўрганди. У борган жамоасига чуқур ёрдам бера олиш учун кўп қиррали ўйинчи ҳисобланади. Агар Гвардиола ҳимояда уч футболчини ўйнатса, у устунлик қилиши мумкин. Сабаби унинг тўп узатиши ва дриблинги ҳимоячи учун юқори даражададир.

Сержиньо Дест – "Барселона"дан "Милан"га – ижара асосида

"Барса": C

"Милан": B

Хави АҚШ терма жамоаси ҳимоячисини "Камп Ноу"да истамаслиги аниқ эди. Шунинг учун у футболчига чиқиш эшикларини кўрсатди. Дестнинг кўп қиррали футболчи экани жамоага қўл келиши мумкин эди. "Барса" уни бошқа жамоага ўтказиб юборишни афзал кўрди. Қанот ҳимоячиси жамоада унга ўйнаш имконияти тақдим этилмаганини кўргач кетишни хоҳлади. 

"Милан" келаси ёзда футболчининг бир йиллик ижара шартномаси муддати тугаганидан кейин 20 млн еврога сотиб олиш имконига эга бўлади. Агар у янги жамоасини ўзига "мафтун эта олса", шартноманинг ушбу банди фаоллашади ва "Милан" яхши битимга эга бўлиши эҳтимоли мавжуд. Бундай бўлмайдиган тақдирда уни осонгина "Барса"га қайтариб бериб юборишади.

Артур Мело – "Ювентус"дан "Ливерпул"га – ижара асосида

"Ювентус": B+

"Ливерпуль": B

72 млн еврога шартнома имзоланган Артур Турин клубида яхши ҳаракатлана олмади. "Ювентус"да ҳозирги пайтда ярим ҳимояда бир нечта яхши вариантлар бор ва шу сабабли Мелонинг ижарага бериб юборилиши барча томонлар учун энг тўғри йўл бўлиб туюлди. Улар 4,5 млн ижара ҳақи оладилар ва у янги жамоасига бутунлай кўчиб ўтадиган бўлса, уни харид қилиш 37,5 млн евро келтиради. Умуман олганда, бу туринликлар учун ёмон эмас. 

"Ливерпуль" жароҳатлар билан боғлиқ муаммоларни ҳал қилиш учун унчалик кўп маблағ сарфлашга тайёр эмас эди, айниқса, улар келаси ёзда "Боруссия" Дортмунддан Жуд Беллингемни олишни хоҳлашади. Артур ҳозирча юзага келган бўшлиқни тўлдириш учун яхши танлов. Мерсисайдликлар уни таркибга вақтинча қўшиш орқали катта таваккал қилаётганлари йўқ. 

Мартин Дубравка – "Ньюкасл"дан "Манчестер Юнайтед"га – ижара асосида

"Ньюкасл": B

МЮ: B

"Ньюкасл" Ник Поупни олиб келгандан сўнг Дубравканинг таркибдаги ўрни хавф остида қолди ва у бошқа клубга ўтишни хоҳлади. Унинг ижара шартномаси келаси ёзда ниҳоясига етади. Уни 6 млн евролик эҳтимолий трансфер кутиб турибди. Бу унинг ўзига боғлиқ бўлади. Мартинни "Ньюкасл"да унчалик соғиниб қолишмайди. 

"Манчестер Юнайтед"да Дубравка де Хеадан кейинги посбон бўлади. Испания терма жамоаси аъзоси ўрнини эгаллаш ҳақида, табиийки, гап-сўз бўлиши мумкин эмас. Лекин Дубравка ҳам тажрибали ва Премьер-лигада қандай ҳаракат қилишни билади. Агар захирада узоқ вақт ўтириш хафа қилмаса, унинг клуб алмаштириши яхши ҳаракат бўлди дейиш мумкин.

Эктор Бельерин – "Арсенал"дан "Барселона"га – эркин агент

"Арсенал": С

"Барселона": B

"Канонирлар" футболчи билан шартномани бекор қилишга рози бўлди. Бир пайтлар Премьер-лиганинг энг яхши қанот ҳимоячилардан бири бўлган Бельерин учун бир неча йил ғалати ўтди. У орзусидаги жамоа "Барселона"га ўтишга қарор қилди. Бу орқали "Арсенал" футболчиларнинг ҳафталик маошлари учун тўланадиган пулни бироз камайтиради. "Барселона" ёшлар жамоаси сафидан олиб кетилган футболчи "Ла Масия йўли"ни яхши билади. Ажабланарли жиҳати, Бельерин 27 ёшда ва у ҳали жамоасига кўп нарса бера олади. Хави уни қўлга киритиб, тўғри йўл тутди. Клуб бунда ҳеч қанча сарфламади.

Мансурбек Неъматов таржимаси