"Тоттенхэм", "Бавария" ва "Реал" каби жамоаларни нима бирлаштириб турибди?

Кучли-бешликда мағлубиятга учрамай келаётган жамоалар билан таништириб ўтамиз.

Англия премьер лигасининг 10-тури ортда қолди. Ушбу чемпионатда ҳали мағлубият нималигини билмай келаётган жамоа "Тоттенхэм" ҳисобланади.

Маурисио Почеттино бошчилигидаги "шпорлар" ҳозиргача ўтказилган 10 та ўйиндан бештасида ғалаба нашидасини суришган бўлса, қолган 5та баҳсда дуранг қайд этишган. Турнир жадвалида ҳам муносиб тарзда 5-поғонада боришмоқда.

Италия А Сериясидаги барча жамоалар 11-турга келиб мағлубият аламини татиб кўришга улгуришган.

Испанияда эса Зинедин Зидан бошқарувидаги "Реал" майдонни боши эгик ҳолда тарк этмаётган ягона жамоа саналади.

Францияда ҳам фақатгина биргина жамоа ҳали мағлубиятга учрамаган. Ҳозир барчанинг ҳаёлига ПСЖ келиши мумкин, йўқ, адашдингиз. Марио Балотелли тўп сураётган "Ницца"ни ҳозирча мағлуб этадиган жамоа топилмаяпти. "Ницца" ўтказилган 11 ўйиннинг 9тасида ғалаба қозонган ва 2 маротаба дуранг ўйнаган. Турнир жадвали карвонбошиси ҳам айнан "Ницца" жамоаси бўлиб турибди.

Бундеслигада ҳали мағлубиятга учрамаган жамоалар сони бошқа лигаларга нисбатан анча кўп. Германия чемпионатининг 9-туридан сўнг "Бавария" билан биргаликда дебютант "Лейпциг" ҳамда 29 ёшли бош мураббий Юлиан Нагельсманн бошқараётган "Хоффенхайм" мағлубиятсиз серияни давом эттиришмоқда.

Ушбу жамоалар мос тарзда 1, 2 ва 3-ўринларни банд этиб туришибди.