Темурхўжа Абдуҳолиқов: "Туркияга қарши ўйин биз учун ҳам жуда қизиқ"

- Терма жамоага чақирувни кўп кутиб қолдингизми?

- Охирги марта Хитойдаги турнир учун терма жамоага чақирилдим. Кутиб қолдим деб ўйламайман. Туркияга қарши баҳсга тайёрман.

- Ўтган мавсум асосан захирадан майдонга тушдингиз, жорий мавсум эса "Локомотив"нинг асосий форвардисиз ва деярли ҳар учрашувда гол уришга муваффақ бўляпсиз...

- Аввалги мавсум Бикмаев билан бирга ўйнадим. Суперлигага мавсум ўртасида келганим туфайли жамоа ва лигага кўникишга вақт керак бўлди. Бу йил "Локомотив" сафида ўзгаришлар бўлди, бунинг устига кадрлар борасида вариантлар кам. Ҳаммамиз жипслашиб, аҳил жамоадек тўп тепишимиз лозим.

- Машғулотда яхши иштирок этдингиз, вазиятлардан унумли фойдаландингиз...

- Бу машғулот. Машғулотда 10талаб гол уришингиз мумкин. Асосийси ўйинда гол уриш.

- Туркия Европа қитъасининг жамоаси, футболчилари ҳам кучли...

- Туркияга қарши учрашув биз учун ҳам қизиқ. Бу учрашув орқали жамоа ва футболчиларнинг савиясини билиб оламиз.

- Турк мухлислари олдида ўйнаш қийин.

- Кўрамиз. Биламиз, туркиялик мухлислар жуда яхши атмосфера яратишади. Рақиб жамоа ишқибозлари бўлсада, стадион тўлиб туриши футболчилар учун ёқимли ҳолат.