Темур Яфаров: "Машъал-2" 11 киши бўлиб дарвозага туриб олди

Натижада "Оқ-тепа" 2-ўринга тушиб қолди ва улар катта эҳтимол билан энди олий лигада 15-ўринни банд этган жамоага қарши плей-офф баҳсини ўтказади. Биз эса "Оқ-тепа" сардори бўлган Темур Яфаров билан суҳбатлашиб, кечаги ўйин ҳақида фикрларини сўрадик.

- "Машъал-2" бутун ўйин давомида ҳимояланди. Деярли 11 киши бўлиб дарвозада турди деса ҳам бўлади. Ҳеч нарса керак эмас бўлган клуб ўлигини ташлади ва бизни қимматли очколардан маҳрум этди. Тўғриси шу куни бизга ҳақиқатдан ҳам омад етишмади. Ғалаба қозонишни жуда-жуда истагандик. Сабаби олий лигага 1-ўринни эгаллаган холда чиқиш асосий мақсадимиз эди.

- Ўйинга тайёргарлик қандай бўлганди? Хотиржамликка берилмадими йигитлар?
- Балким... Фикрингизга қўшиламан эхтимол ёшларда ўйиндан олдин хотиржамлик бўлгандир. Аммо тажрибали футболчилар вазиятни жуда яхши тушуниб турганди. Агарда очко йўқотсак, ҳаммаси тамом бўлишини билардик. Афсуски асосий рақобатчимизни ўтказиб юбордик.

- Аксига олиб ушбу оқшом "Обод" сафардан ғалаба билан қайтди. Сизлар учун энг аламлиси ҳам шу бўлди. Тўғрими?
- "Обод"ни ушбу муваффақият билан табриклайман. Улар элитага деярли чиқди. Чиққанда ҳам ҳақли равишда. Аммо биз улардан кучли эдик. Буни ўзаро икки учрашувда исботлагандик.

- Кейинги турни сафарда ўтказасизлар. Шунчаки расмиятчилик учун ўйнаб қайтасизларми? Бундай дейишимизнинг боиси кўпчилик Ободнинг кейинги турда "Косонсой"ни мағлуб этишини айтмоқда.
- Нима ҳам қилардик....Ҳаёт давом этади. Ҳозирдан тақдирга тан бериш яхшимас. Охиригача курашамиз. Агарда плей-оффда иштирок этсак, астойдил ўйнаймиз.


Исломбек Рустамбеков.