Суперкубок-2022. Рўзиқул Бердиев: "Балки "Навбаҳор" билан ўйинда таркибимизни ўзгартирармиз"

"Ўйин сифати у қадар юқори бўлмади. Битта хато натижага таъсир қилишини билардик. Гол ўтказилган вазиятда ҳимояда парокандалик кузатилди. Бугунги ўйин ўтган йилги Суперкубок ўйинини ёдга солди. "Пахтакор"ни ғалаба билан табриклайман.

Бугун Ҳусниддин Алиқуловни таваккал қилиб ҳужумга туширдим. Ўйинни қутқармоқчи бўлдик.

Ойбек Бозоровнинг йўқлиги Шерзод Насруллаевга ҳам таъсир қилди. Соловьёв жамоамизга яқинда келди, ҳали ўйинимизга киришиб кетмади. Нафақат унда, балки тажрибали футболчиларимизда ҳам кўп хатолар бўлди: Станоевич, Муҳитдиновда.

4-3-3 схемасида ҳаракатландик. Марко Станоевич ва Шароф Муҳитдинов кўпроқ ҳужумда ёрдам бериши лозим эди.

Голни яхшилаб таҳлил қиламиз, бизнинг талабимиз бошқача эди. Қайтараман, бугун хатолар кўп бўлди. Голдан кейин ҳужумга берилганимиз учун "Пахтакор" қарши ҳужумларга бемалол ўтди.

"Навбаҳор" вакиллари бугунги ўйнимизни кузатди? Улар нафақат бугунги ўйинимиз, балки Туркиядаги ҳамма ўйинимизни кўриб, ўрганиб чиқишди. Лекин биз балки кейинги ўйинда схемамизни ва таркибимизни ўзгартирармиз.

Босния ва герцеговиналик ҳужумчи рўйхатдан ўтказилди, фақат лицензия олса бўлди. Агар унинг ҳолати яхши бўлса, "Навбаҳор" билан ўйинда майдонга тушади", –деди Рўзиқул Бердиев.