"Шўртан": Стадионда бошланган байрам, ҳали давом этади

Бутун мавсум давомида стадионга ташриф буюрган ва севимли футболчиларини ҳар томонлама қўллаб-қувватлаб турган фидоий мухлислар сўнгги тур учрашувига ҳам байрамона руҳда ташриф буюришди. Бу сафар ҳам «Шўртан» жамоаси ғузорликларга ғалаба шодиёнасини тақдим этишди ва ўз ҳисобларига рекорд даражадаги – 77та очкони ёзиб қўйишди. Навбатдаги учрашувда ҳам ўзининг тўпурарлик қобилиятини намойиш этган тажрибали ҳужумчи Виктор Клишин эса мавсумдаги 40-голини дарвозага киритишга муваффақ бўлди.  

Учрашув якунига етгач, стадионда катта байрамнинг нишонаси бошлаб юборилди. Ҳар иккала жамоа вакиллари ҳамда ҳакамлар гуруҳи мухлислар олдида саф тортишди. Қашқадарё вилояти Ғузор тумани ҳокими, Олий Мажлис сенатори, туман футбол федерацияси президенти Донаев Шомурод Холбоевич футбол бўйича 2014 йилги Ўзбекистон биринчилиги баҳсларида муддатидан олдин - ҳам Олий лига йўлланмаси, ҳам мусобақа чемпионлигини қўлга киритган «Шўртан» жамоаси, клуб раҳбарияти, ходимлар, мураббийлар гуруҳи, футболчилар ва мухлисларни қутлади. Ғузор жамоаси мамлакат футболида ўз ўрни ва обрўсига эга эканлигини таъкидлаган Ш.Донаев, янги – 2015 йилги футбол мавсумида ҳам «Шўртан» жамоасининг олдига кучлилар сафида чиройли ва мазмунли ўйинлар намойиш этиб, ажойиб ғалабаларни қўлга киритиб, мухлисларни қувонтириш каби мақсадлар қўйилганлигини айтиб ўтди.

Шундан сўнг, «Шўртан»ни 2014 йилги футбол мавсумида катта ғалабага етаклаб келган бош мураббий Мухтор Қурбонов, шунингдек бошқарув ва ташкилий ишларда жонбозлик кўрсатган клуб Бош директори Облаёр Расуловлар ўзбекона урф-одатларимизга кўра Ғузор тумани ҳокимлигининг қимматбаҳо совғалари – зарбоф тўн, белбоғ ва дўппи билан тақдирланишди.

Ҳар иккала жамоа сардорлари эса давлатимиз мадҳияси садоси остида 2014 йилги биринчилик байроғини туширишди.

Биз юқоридаги мақоламизга «СТАДИОНДА БОШЛАНГАН БАЙРАМ, ҲАЛИ ДАВОМ ЭТАДИ» сарлавҳасини бежизга танламадик. Гап шундаки, 2014 йилги Ўзбекистон биринчилигида чемпионликни қўлга киритган жамоамиз аъзоларини муносиб тақдирлаш ва уларга байрам дастурхони ташкил қилиш клуб раҳбариятининг режасида бор. Демак, «Шўртан» учун ҳозирча мавсум тўлиқ якунига етган эмас...