Сервер Жепаров: «Катта эҳтимол билан хориж клубларининг бирига ўтаман»

Йил бошида «Ульсан Хюндай» сафига қўшилган ҳамюртимиз ушбу клуб сафида 22та ўйинда майдонга тушиб, 6та голга муаллифлик қилди. Жепаров Корея К-лигасида 5 мавсум тўп сурди. Умуман олганда, терма жамоамизнинг вице-сардори легионер сифатида 2010-2011 йилларда «Сеул», 2011-2013 йилларда Саудия Арабистонининг «Ал-Шабаб», 2013-2014 йилларда «Сеонгнам Илва Чунма» каби хориж клубларида фаолият олиб борган. Биз билан суҳбатда Жепаров режалари билан ўртоқлашди

- Сервер, "Ульсан" билан хайрлаши сиз учун кутилмаган ҳолат бўлдими?

- ...

- Жамоа билан шартномангиз тугаётганмиди?

- Худди шундай. Клуб билан мавсум бошида бир йиллик шартномага имзо чеккан эдим.

- Энди режалар қандай?

- Ўзим учун янги жамоа излайман.

- Ўзингизга қолса, «Ульсан» билан шартномани узайтиришни истармидингиз?

- Икки томон ўзаро келишган ҳолда шундай қарорга келдик. Бундан афсусда эмасман. «Ульсан Хюндай» билан шартномам 31 декабрь куни якунланади. Шундай экан, мен ҳали-ҳамон «Ульсан» аъзосиман. Лекин шуниси аниқки, келишув бошқа узайтирилмайди.

- Балки Ўзбекистонга қайтиш фурсати келгандир?

- Мен бундай деб ўйламайман. Умид қиламанки, ҳали хориж клубларининг бирида ўйнаш имконияти юзага келади. Бунга куч-қувватим етади.

- Хориж клубларидан таклифлар бўляптими?

- Ҳали озод агентга айланмадим. Шартномамнинг бир куни қолгунича ҳам у кучда бўлади. Лекин таклифларни кўриб чиқишга тайёрман. Оғзаки қизиқишлар бор. Тез орада қизиқиш билдираётган клублар номи ойдинлашиб қолади.

- Араб клублари, балки Қозоғистон жамоаларидан таклифлар тушар? Шундай бўлган тақдирда, уларга қандай муносабатда бўласиз?

- Олдин таклиф бўлаверсин-чи,  кўриб чиқиш қочмайди. Катта эҳтимол билан янги мавсумни ҳам хориж клубларининг бирида бошлайман.

Камолиддин АЛИМОВ суҳбатлашди