Сергей Рекун: "Машғулотлар кучайтирилган режимда давом этмоқда"

Шерлар йиғин доирасидаги дастлабки назорат учрашувини Россия биринчи дивизиони вакили "Нефтехимик"ка қарши ўтказиб, дуранг натижа қайд этишганди. Режага кўра, илк хориж йиғинидаги иккинчи ўртоқлик учрашуви эртага Польшанинг "Ягеллония" клуби билан ўтказилади. Бу жамоа айни пайтда мамлакат Экстраклассасида (олий лига) 9-поғона бормоқда.

Биз машғулотлар қандай давом этаётгани ҳақида маълумот олиш учун "Пахтакор" ярим ҳимоячиси Сергей Рекун билан боғландик.

Сергей Рекун: "Машғулотлар жуда қизиқарли ва шу билан бирга кучайтирилган тартибда олиб бориляпти. Кўз тегмасин, жамоадаги ички муҳит аъло даражада. "Нефтехимик" билан бўлиб ўтган ўйинга келсак, учрашув оғир кечди. Сабаби шундаки, машғулотларда жисмоний юкламаларга кўп эътибор қаратиляпти. "Нефтехимик" яхши савиядаги жамоа экан. Ҳар бир чизиғида тенг кучли футболчилар жам бўлган. Хоҳ у ўртоқлик бўлсин, хоҳ расмий учрашув, биз ҳар бир ўйинга фақат ғалаба учун чиқамиз. Бу ўйин ҳам бундан мустасно бўлмади. Лекин бу футбол, унда ҳамиша ғалаба қозонишнинг иложи йўқ. Ишончим комил, ўйиндан ўйинга кучайиб борамиз. Куни кеча сафимизга Артем Филипосян келиб қўшилди. Камол ака (Камолиддин Тожиев назарда тутилган) ва Егор ҳақида гапирмасам ҳам бўлади. Улар "Пахаткор" учун янги ўйинчилар эмас.